پڕۆژەی ڕووناکی گەیشتە سەنتەری ڕانیە

ئاڤا نیوز

دوای مژدەکەی سەرۆکوەزیران مەسرور بارزانی، پڕۆژەی ڕووناکی گەیشتە سەنتەری شاری ڕانیە و زیاتر لە 135 هەزار هاونیشتمانی قەزاکە لە کارەبای 24 کاتژمێری سوودمەند دەبن.

چیرۆکی سەرەکی: ڕۆژی دووشەممەی ڕابردوو، سەرۆکوەزیران مەسرور بارزانی، مژدەی کارەبای 24 کاتژمێری بۆ سەنتەری قەزای ڕانیە ڕاگەیاند، ئەمڕۆش بە فەرمی پڕۆژەی ڕووناکی گەیشتە ڕانیە.

لێدوانی فەرمی: تیمی پڕۆژەی ڕووناکی بە ئاڤایان گوت: پڕۆژەی ڕووناکی گەیشتە سەنتەری قەزای ڕانیە، کارەبای 24 کاتژمێری بە 30 هەزار هاوبەش دراوە، کە زیاتر لە 135 هەزار هاونیشتمانی لێی سوودمەند بوونە.

زانیاریی زیاتر: پڕۆژەی ڕووناکی زیاتر لە 100 مۆلیدە لە ڕانیە دەکوژێنێتەوە، ئەمەش کاریگەری ڕاستەوخۆی لەسەر ژینگەی ڕانیە و دەوروبەری دەبێت.

ئەوەی پێویستە بیزانیت: تا ئێستا نزیکەی چوار ملیۆن و 500 هەزار هاونیشتمانی لە پڕۆژەی ڕووناکی سوودمەندبوونە و کارەبای 24 کاتژمێرییان پێگەیشتووە کە دەکاتە نزیکەی 70%ـی دانیشتووانی هەرێمی کوردستان، هاوکات پڕۆژەی ڕووناکی نزیکەی سێ هەزار و 700 مۆلیدەی کوژاندووەتەوە، کە دەکاتە 50%ـی کۆی مۆلیدەکانی کوردستان.

بۆچی گرنگە: سوودمەندبووانی پڕۆژەی ڕووناکی جگە لەوەی کارەبای 24 کاتژمێرییان بۆ دابین دەکرێت، لەژێر نرخە نوێیەکاندا، 80%ـی هاونیشتمانیان پارەیەکی کەمتر دەدەن بە کارەبا بە بەراورد بەو پارەیەی دەیاندا بە هەردوو کارەبای نیشتمانی و کارەبای مۆلیدە.


باکگراوند: مانگی تشرینی دووەمی ساڵی 2024، سەرۆکوەزیران مەسرور بارزانی، پڕۆژەی ڕووناکی ڕاگەیاند بە مەبەستی گەیاندنی کارەبای 24 کاتژمێری بۆ سەرجەم ماڵ و شوێنە بازرگانییەکان تاوەکو کۆتایی ساڵی 2026.