ئاڤا چیرۆكی دەستپێكی پڕۆژەی ڕێڕەوی ژیان و بیرۆكەكەی مەسرور بارزانی ئاشكرا دەكات

ئاڤا نیوز

سەرۆکوەزیرانی هەرێمی کوردستان، مەسرور بارزانی، بەردی بناغەی پڕۆژەی "ڕێڕەوی ژیان"ـی لە گەڕەکی پێنج حەسارۆکی هەولێر دانا. ئەم پڕۆژەیە، کە قۆناغی یەکەمی دەستیپێکردووە، ئامانجی گۆڕینی ناوچەیەکی مردوو و پڕ لە پاشماوە بۆ ناوچەیەکی گەشتیاری و خزمەتگوزاری زیندوو و سەرنجڕاکێشە.

چیرۆکی سەرەکی: بڕیاری دەستپێکردنی پڕۆژەی "ڕێڕەوی ژیان" دوای ئەوە هات کە سەرۆکوەزیران مەسرور بارزانی لەکاتی گەڕانەوەی لە دانانی بەردی بناغەی پڕۆژەیەکی دیکە، چاوی بەو ناوچەیە کەوتووە وتوویەتی ئێرە بۆ ئاوایە و پەراوێز خراوە و توڕە بووە. لەو کاتەدا بیرۆکەی دروستکردنی پڕۆژەیەکی جوان و خزمەتگوزاری بە تیمەکەی داوە، وتوویەتی، دەبێت جوانترین پڕۆژەیان بۆ بکەن و نامەوێ جارێکی تر ئاوا بیبینمەوە.

ئەم پڕۆژەیە درێژکراوەی هەوڵەکانی حکومەتی کوردستانە بۆ دابینکردنی خزمەتگوزارییەکانی وەک کارەبای 24 کاتژمێری و پڕۆژەی ئاو، کە سەرەتا لە گەڕەکە هەژارنشین و میللییەکانەوە دەستیپێکردووە. ئامانج لەم هەنگاوانە نەهێشتنی جیاوازییە لەنێوان گەڕەکەکان و ناوچە جیاوازەکاندا.

پەیامی فەرمی: سەرۆکوەزیران مەسرور بارزانی لە وتارێکیدا جەختی لەوە کردەوە کە "ئەم شۆڕشی ئاوەدانییەی دەستمان پێکردووە، هەموو شوێنێکی کوردستان دەگرێتەوە، جیاوازی لەنێوان شارەکاندا ناکەین، لەناو شارەکانیشدا جیاوازی لەنێوان گەڕەکەکاندا ناکەین".

هەولێر دەکرێتە یەکێک لە شارە هەرە گەشتیارییەکانی جیهان. ئەوەی سەرۆکوەزیرانی دڵخۆش کردووە، دروستبوونی متمانەیە لەنێوان حکومەت و هاووڵاتیاندا، هەروەها پەیوەندییەکی تەندروست لەنێوان حکومەت و کەرتی تایبەتدا، کە ئەمەش وادەکات سووربن لەسەر پێشکەشکردنی خزمەتگوزاری زیاتر بە هاووڵاتیان. سەرۆکوەزیران داوای لە هاووڵاتیان کرد کە یارمەتی حکومەت بدەن بۆ پاراستنی ژینگەی کوردستان.

وردەکاری پڕۆژەکە: پڕۆژەی "ڕێڕەوی ژیان" دەریاچەیەک لەخۆدەگرێت و لەتەنیشتیشیدا سەوزایی و شوێنی گەشتیاری سەرنجڕاکێش دروست دەکرێت. پڕۆژەکە چەندین خزمەتگوزاری دیکە لەخۆدەگرێت وەک چێشتخانە، شوێنی یاری منداڵان، شوێنی وەرزش و پشوودان. ئەم پڕۆژەیە بە تەواوبوونی دەبێتە ناوچەیەکی زیندوو و گەشتیاری، کە کاریگەری ئەرێنی لەسەر بەهای خانووبەرە لەو ناوچەیە دەبێت و هاووڵاتیانی هەژار و کەمدەرامەت سوودێکی زۆر وەردەگرن.

لە کۆتایی ڕێوڕەسمەکەدا، عوبەید هەرکی، پەیامنیری ئاڤا لێی پرسی جەنابی سەرۆکوەزیران، بەحوکمی ئەوەی هەموو ڕۆژێک پرۆژەیەکی نوێ دەکەیتەوە و بەردی بناغەی پڕۆژەیەک دادەنێی، 'سبەی' بووە بە ترێند، سبەی چ پڕۆژەیەک دەکەیتەوە، ئەویش وتی، چاوەڕوان بن پرۆژەی دیکەیش دەکەینەوە.