شۆکی هەڵبژاردن ڕوویدا؛ بۆ یەکەمجار لە سلێمانی و دەوروبەری زۆرترین ڕێژەی دەنگی پووچەڵ تۆمار کرا

ئاڤا نیوز

بەپێی دەنگە جیاكراوەكانی بنكەكانی دەنگدان لە پارێزگای سلێمانی، زیاتر لە 16 هەزار دەنگی نێو سندووقەكان پووچەڵ كراونەتەوە و لە ئامێری ژماردن و جیاكردنەوەی دەنگەكان، بە پووچەڵ هەژمار كراون.

چیرۆکەی سەرەکی: ئەمڕۆ یەکشەممە پرۆسەی دەنگدانی تایبەت بۆ هەڵبژاردنی پەرلەمانی عێراق بەڕێوەچوو؛ 276 هەزار و 613 دەنگدەر کە پێکهاتوون لە پێشمەرگە و هێزە ئەمنییەکان لە چوار پارێزگاکەی هەرێمی کوردستان بەشداریی پرۆسەی دەنگدانی تایبەتیان کرد.

بەپێی نوێترین زانیاریی بەدەستهاتوو، لە پارێزگای سلێمانی 16 هەزار و 961 دەنگی پووچەڵ هەبووە، پارێزگای هەولێر لە پلەی دووەمدایە و 11 هەزار و 915 دەنگ پووچەڵ بوون، بەڵام لە پارێزگای دهۆک تەنها 3 هەزار و 567 دەنگی پووچەڵ هەبوون.

زانیاریی تایبەت؛ زۆرترین دەنگی پووچەڵ لەسەر ئاستی كوردستان، لەسنووری پارێزگاكانی سلێمانی و هەڵەبجە تۆماركراون؛ نزیكەی 17 هەزار دەنگی نێو سندووقەكان پووچەڵن. لە پارێزگای هەڵەبجە و ئیدارەی سەربەخۆی ڕاپەڕین، دەنگی پووچەڵ دووەمە.

هۆكارە زانراوەكان: هۆكارەكەشی ئەوەبووە، یەكێتی داوای لە ژمارەیەكی زۆری ئەندامانی هێزە ئەمنییەكان كردووە، دەنگ بە كەسێكی كورسیی كۆتا بدەن، بەهۆیەوە بەشێكیان دووچاری هەڵە هاتوون و بەشێكیشیان لەم داواكارییە هەڵوێستیان وەرگرتووە و بە ئەنقەست دەنگەكانیان پووچەڵ كردووەتەوە.

ژمارەکان وا دەڵێن: بەگوێرەی ئەو داتا و زانیارییانەی دەست ئاڤا کەوتوون، لە سەر ئاستی هەرێمی کوردستان لە پارێزگاكانی سلێمانی و هەڵەبجە،  16 هەزار و 961 دەنگی پووچەڵ هەبووە، تەنیا لە سەنتەری سلێمانی، حەوت هەزار و 452  دەنگی پووچەڵ تۆماركراون.

لە دوو بنكەی پارێزگای هەڵەبجە، 611 دەنگی پووچەڵ هەبوون، لەكاتێكدا دەنگی یەكێتی، هەزار و 126 دەنگە، هاوكات لە سنووری ئیدارەی ڕاپەڕین، دوو هەزار 455  دەنگی پووچەڵ هەبوون، لە قەزای کەلاریش 164 دەنگی پووچەڵ هەبوون.