نوێترین لێدوانی تەیف سامی لەبارەی مووچەی مانگی نۆ

ئاڤا نیوز

بەرپرسێکی باڵای کورد لە بەغدا لەگەڵ تەیف سامی کۆبووەتەوە و لەبارەی مووچە گفتوگۆیان کردووە، تەیف سامی وتویەتی، ڕەنگە سبەی دەست بە دابەشکردنی مووچەی فەرمانبەرانی خۆمان بکەین، دوای ئەوە هی کوردستانیش دەنێرین.

چیرۆکی سەرەکی: ئەمڕۆ یەکشەممە، بەرپرسێکی باڵای کورد لە بەغدا لەگەڵ تەیف سامی، وەزیری دارایی عێراق کۆبووەتەوە و باسی مووچەیان کردووە. بەگوێرەی قسەی تەیف سامی، ڕەنگە کۆتایی ئەم هەفتەیە مووچەی مانگی نۆ خەرج بکات.

لێدوانی فەرمی: بەرپرسێکی باڵای کورد لە بەغدا بە ئاڤای وت، لەگەڵ تەیف سامی لەبارەی مووچە کۆبووەتەوە، تەیف سامی گوتوویەتی: هێشتا لە عێراق دەستمان بە دابەشکردنی مووچە نەکردووە، ڕەنگە سبەی ئێوارە دەستپێبکەین، کەمێک ئارام بگرن بزانین چۆن دەبێت، دوای ئەوەی مووچەی ژمارەیەک وەزارەتی خۆمان دا هی ئێوەش دەنێرین.

لەلایەکی دیکەوە: لەبارەی دواکەوتنی دابەشکردنی مووچە لە عێراق بەرپرسە کوردەکە گوتی: لە عێراق کێشەی پارەی کاش هەیە و حکومەت پارەی پێویستی لەبەردەست نییە، لە کۆی 139 تریلیۆن دیناری چاپکراو، تەنیا 30 تریلیۆن دینار دیارە و لە بازاڕە، ئەویش زۆربەی لە دەستی خەڵکە، ئەوەی تر کەس نازانێ لە کوێیە و چی لێهاتووە؟

زانیاریی زیاتر: حکومەتی عێراق مانگانە پێویستی بە زیاتر لە هەشت تریلیۆن دینارە بۆ مووچە، مانگانەش ئەو مەبلەغەی پێ کۆناکرێتەوە، بۆیە مانگانە وەزارەتی دارایی عێراق بڕێک پارە لە بانکی ناوەندی وەردەگرێت بە قەرز و بەشێوەیەکی کاتی، بەڵام بانکی ناوەندیش بڕێکی کەمی پێدەدات و زۆر هاوکارییان ناکەن.

لەبارەی وادەی ناردنی مووچەی خەڵکی کوردستان، بەرپرسە کوردەکە وتی: پێشبینی دەکەم ڕۆژی پێنجشەممە بنێردرێت، ئەگەرنا دەکەوێتە هەفتەی داهاتوو.