دوای بەدواداچوونی ئاڤا؛ سەنتەری ئۆتیزم لە ئیدارەی ڕاپەڕین دەكرێتەوە

ئاڤا نیوز

دوای بڵاوكردنەوەی هەواڵێك لەبارەی نەبوونی سەنتەرەكانی ئۆتیزم و تالاسیما لە سنووری ئیدارەی ڕاپەڕین، سبەی دووشەممە، سەنتەری ئۆتیزم لە ڕانیە دەكرێتەوە كە دەبێتە یەكەم سەنتەری لەمجۆرە لە سنوورەكە.

وێنە گەورەكە: لە سنووری پارێزگای سلێمانی و ئیدارەی ڕاپەڕین، زیاتر لە دوو هەزار منداڵی ئۆتیزم هەن، کەچی تەنیا یەک سەنتەری ڕاهێنانی ئۆتیزم هەیە و تەنیا 100 منداڵ ڕاهێنان وەردەگرن، ئەمەش دایک و باوک و کەسوکاری توشبووانی ئۆتیزمی نیگەران کردووە.

لێدوانی فەرمی: ئاریان محەممەد، وتەبێژی وەزارەتی كار و كاروباری كۆمەڵایەتی بە ئاڤای ڕاگەیاند، سبەی دووشەممە، یەكەم سەنتەری ئۆتیزم لە ڕانیە دەكرێتەوە كە لەلایەن وەزارەتی كار و كاروباری كۆمەڵایەتی سەرپەرشتی دەكرێت،  تایبەت دەبێت بە ڕاهێنان و شیاندنی ئەو منداڵانەی ئۆتیزمن.

ئەوەی پێویستە بیزانیت: لە سنووری ڕانیە و قەڵادزێ، زیاتر لە 100 منداڵی ئۆتیزم هەن و هیچ سەنتەرێكی ئۆتیزمی نەبوو، لە مانگی نیسانی ڕابردوو ژمارەیەك خانەوادە كە منداڵی ئۆتیزم و تووشبووی تالاسیمایان هەیە، هانایان بۆ ئاڤا هێنا و ئاڤاش دەنگی بە لایەنی پەیوەندیدار گەیاندن.