بەڕێوەبەری نەخۆشخانەی شار: شێرزاد حەسەن زەبر بەر مێشکی کەوتووە و خوێنبەربوونێکی کەمی هەیە

ئاڤا نیوز

بەڕێوەبەرایەتیی تەندروستی سلێمانی ڕایگەیاند، زەبر بەر مێشکی شێرزاد حەسەن کەوتووە و ئێستا لە ژێر چاودێری چڕدایە.

چیرۆکی سەرەکی: پێش نیوەڕۆی ئەمڕۆ دووشەممە، لە نزیک گەڕەکی عەقاری سلێمانی، تاکسیەک خۆی کێشا بە شێرزاد حەسەن، نووسەر و چیرۆکنووسی کورد.

لێدوانی ڕۆژنامەوانی: ئومێد هیدایەت، بەڕێوەبەری کارگێڕی نەخۆشخانەی شار لە سلێمانی لە کۆنگرەیەکی ڕۆژنامەوانیدا ڕایگەیاند: بەهۆی ڕووداوەکەوە زەبر بەر مێشکی شێرزاد حەسەن کەوتووە، وێنەی تیشکی مێشکمان بۆ گرت و لە سیتی سکانەکەدا دەرکەوت، کە مێشکی شڵەقاوە و خوێنبەربوونێکی کەمی هەیە.

لێدوانی فەرمی: بەڕێوەبەری کارگێڕی نەخۆشخانەی شار بە ئاڤای وت: ئێستا شێرزاد حەسەن پێویستی بە چاودێری زیاتر هەیە و لە ژێر چاودێری چڕە. لە چەند کاتژمێری داهاتووش جارێکی دیکە وێنەی تیشکی مێشکی بۆ دەگرینەوە، بۆ ئەوەی بزانین ئاستی خوێنبەربوونەکە چەندە.

زانیاریی زیاتر: ئەو شۆفێرەی کە بە ئۆتۆمبێلەکەی لە شێرزاد حەسەنی داوە، هەر خۆی بە برینداری گەیاندوویەتییە نەخۆشخانەی شار، لەلایەن پۆلیسی نەخۆشخانەکەوە ڕێکارە یاساییەکانی بەرامبەر گیراوەتەبەر.