هەژماری من یەک ملیۆن مووچەخۆری تێپەڕاند

ئاڤا نیوز

تۆمارکردنی مووچەخۆران لەدوای هۆشدارییەکەی وەزارەتی دارایی و ئابووریی کوردستان لە پڕۆژەی هەژماری من زۆر خێرا کراوە و ئیستا پڕۆژەکە لە قۆناغی کۆتایی دایە و تاوەکو ئێستا زیاتر لە 156 هەزار مووچەخۆر ماون خۆیان تۆمار بکەن.

چیرۆکی سەرەکی: کۆتایی ئەمساڵ دوایین مۆڵەتە بۆ هەموو مووچەخۆران، خۆیان تۆمار نەکەن مووچەیان ڕادەگیرێت، چونکە دابەشکردنی مووچە بە کاش دەوەستێت و دەبێت لە ڕێگەی ATM مووچە وەربگرن. 

لێدوانی فەرمی: هیوا ئەفەندی، سەرۆکی فەرمانگەی تەکنەلۆژیای زانیاریی لەوبارەیەوە بە ئاڤای ڕاگەیاند: تاوەکو ئەمڕۆ ژمارەی ئەو مووچەخۆرانەی خۆیان تۆمار کردووە،  گەیشتووتە یەک ملیۆن و 44 هەزار مووچەخۆر.

ژمارەکان وادەڵێن: زیاتر لە یەک ملیۆن و 200 هەزار مووچەخۆرمان لە هەرێمی کوردستان هەیە، ئێستا زیاتر لە 156 هەزار مووچەخۆر ماون خۆیان تۆمار بکەن، لەو ژمارەیە زیاتر لە 90 هەزار مووچەخۆریش لە سنووری سلێمانین.

-ئەو فەرمانبەرانەی تاوەکو ئێستا کارتی بانکیان وەرگرتووەتەوە 612 هەزار مووچەخۆرن، هێشتا 432 هەزار مووچەخۆر ماون کارتەکانیان وەربگرنەوە. 

- هەر لەو ژمارەی کارتەکانیان تەواوبووە نەچوون بۆ وەرگرتنەوە، بە تایبەت خانەنشینان 31 هەزار و 500 کارت ئامادەن بەڵام خانەنشینان نەچوون وەریان بگرنەوە.

ئەوەی پێویستە بیزانیت: مووچەخۆران و خانەنشینان، لەکاتی وەرگرتنی مووچەی مانگی 9 پێویستە ئەوانەی کارتەکانتان تەواو بووە بچن وەری بگرنەوە، ئەوانەی خۆشیان تۆمار نەکردووە دەبێت فۆرم وەربگرن و پڕی بکەنەوە، دەنا مووچەی مانگی 10 یان ڕادەگیرێت.