ئەیاد عەللاوی: سەدر ناگەڕێتەوە ناو پرۆسەی سیاسی

ئاڤا نیوز

سەرۆکوەزیرانی پێشووتری عێراق پێی وایە جارێکی دیکە سەدر ناگەڕێتەوە ناو پرۆسەی سیاسی، هەروەها محەممەد شیاع سوودانی بە باشترین سەرۆکوەزیران ناو دەبات.

 

لێدوانی فەرمی: ئەیاد عەللاوی، سەرۆکوەزیرانی پێشووتری عێراق ڕایگەیاند: موقتەدا سەدر، ڕێبەری ڕەوتی سەدر ناگەڕێتەوە ناو پڕۆسەی سیاسی، کشانەوەشی هەڵەبوو، دوای ڕێگەگرتنی بۆ پێکهێنانی حکومەت، دەبووایە پەرلەمانی کۆترۆڵ بکردایە، چوونی بە ئاراستە خوێندنگەی ئایینی مەترسی دروست دەکات بەتایبەت کە ئەو کەسایەتییەکی شۆڕشگێڕی هەیە.

 

لەلایەکی دیکەوە: بەڕای ئەیاد عەللاوی، محەممەد شیاع سوودانی باشترین سەرۆکوەزیرانە لەدوای ساڵی 2003، سوودانی لە سیاسییەکانی ناوخۆی عێراق بووە، لە دەرەوە نەژیاوە تاوەکو بکەوێتە ژێرکاریگەریی وڵاتان، بە پلەبەندی پۆستەکانی بڕیوە تاوەکو بووە سەرۆکوەزیران.

 

ئەوەی لەبارەیەوە دەگوترێت: ئەیاد عەللاوی دەڵێت: سوودانی تۆمەتبار نییە بە گەندەڵی، بەشێوەیەکی مەدەنیش مامەڵە دەکات، هەندێک کێشە لە حکومەتەکەیدا هەیە، بەڵام لەهەمووان باشترە.