941 ملیار دینار خرایە سەر هەژماری وەزارەتی دارایی و سبەی دەست بە دابەشکردنی دەکرێت

 ئاڤا نیوز

 

وەزارەتی دارایی عێراق، گوژمەی 941 ملیار و 874 ملیۆن دیناری بۆ مووچەی مانگی نۆ خستە سەر هەژماری بانكیی وەزارەتی دارایی و ئابووریی هەرێمی كوردستان و سبەی دەست بە دابەشکردنی دەکرێت.

 

چیرۆکی سەرەکی: دوای نیوەڕۆی ڕۆژی پێنجشەممە 27ـی تشرینی دووەمی 2025، وەزارەتی دارایی عێراق دوای كۆتاییهاتنی كاتی ئاسایی دەوام، بڕیاری خەرجكردنی مووچەی مانگی نۆی مووچەخۆرانی هەرێمی کوردستانی دا و هەمان ڕۆژ، ڕێكارەكانی ناردنی پارەكە تەواوكران.

 

ڕاگەیێنراوی فەرمی: وەزارەتی دارایی و ئابووری هەرێمی کوردستان بڵاوی کردەوە، ڕۆژی شەممە  2025/11/29، بڕی 941  ملیار و 847 ملیۆن دینار وەک تەمویلی مووچەی مانگی ئەیلولی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندیی عێراق.

 

هەنگاوی داهاتوو: چاوەڕوان دەكرێت لە نزیكترین كاتدا لیستی مووچە ڕابگەیێنرێت و سبەی دەست بە دابەشكردنی مووچە دەكرێت.

 

لێدوانی فەرمی: سەرچاوەیەک لە وەزارەتی دارایی و ئابووریی کوردستان بە ئاڤای ڕاگەیاند، سبەی  یەکشەممە دەست بە دابەشکردنی مووچە دەکرێت و بە سێ ڕۆژ مووچەی سەرجەم مووچەخۆران دابەش دەکرێت.

 

ئەو سەرچاوەیە ڕوونیشی كردەوە، هاوشێوەی مانگەكانی ڕابردوو، بە سێ ڕۆژ مووچەی سەرجەم وەزارەت و دامودەزگاكان بە کاش، هەم بە دیجیتاڵی لەڕێگەی هەژماری من دابەش دەکرێت.