وەستانی کێڵگەی غازی کۆرمۆر ڕۆژانە ملیۆنان دۆلار زیان دەدات

ئاڤا نیوز

 

بەهۆی وەستانی بەرهەمهێنان لە كێڵگەی غازی كۆرمۆر، ڕۆژانە زیانێكی دارایی گەورە دەكەوێتەوە كە بە زیاتر لە حەوت ملیۆن دۆلار دەخەمڵێنرێت، ئەمە جگە لەو زیانانەی بەر كەرتی كارەبا و گواستنەوە دەكەون.

 

چیرۆكی سەرەكی:  کاتژمێر 11:30ـی شەوی چوارشەممەی رابردوو، هێرش كرایە سەر كێڵگەی كۆرمۆر لە چەمچەماڵ، بەهۆیەوە بەشێكی كێڵگەكە گڕی گرت و زیانی زۆری بەركەوتووە، بەهۆیەوە بەرهەمهێنانی غاز لە كێڵگەكە وەستاوە.

 

لێدوان فەرمی: ڕوانگەی ئیكۆ عێراق لە ڕاگەیەندراوێكدا ڕوونیكردەوە: "پێش بەئامانجگرتنی، كێڵگەكە ڕۆژانە نزیكەی 530 ملیۆن پێ سێجا غازی سروشتی بەرهەم دەهێنا، كە نرخی هەر ملیۆن پێ سێجایەك بە نزیكەی 10 هەزار دۆلار دەخەمڵێندرێت".

 

زیانە سەرەكییەكان: جگە لە غازی سروشتی، كێڵگەكە سەرچاوەی سەرەكیی چەند بەرهەمێكی دیكە بووە، ڕۆژانە زیاتر لە 580 تۆن غازی شل (LPG)ـی بۆ غازی ماڵان بەرهەم دەهێنا بە نرخی 500 دۆلار بۆ هەر تۆنێك، لەگەڵ بەرهەمهێنانی 22 هەزار بەرمیل غازی خەست (Condensate) بە نرخی 60 دۆلار بۆ هەر بەرمیلێك.

 

زۆر زیاتر: ئەو ژمارانەی ڕاگەیەندراون تەنها زیانە راستەوخۆكانی فرۆشتنی غازن، بەڵام زیانە زیادەكان وەك كرێی كۆمپانیاكانی بەكارخستن، تێچووی گواستنەوە و كاریگەریی كەمبوونەوەی بەرهەمهێنانی وزەی كارەبا لەخۆناگرن.