نزیكەی 10 ملیۆن كەس لە عێراق مووچەخۆرن

ئاڤا نیوز

نزیكەی 10 ملیۆن كەس لە عێراق مووچەخۆرن، ئەگەر مووچەخۆرانی هەرێمی كوردستانی بۆ زیاد بکرێت لە 70% ی داهاتی نەوتی عێراق بۆ مووچە دەڕوات.

لێدوانی فەرمی: نەبیل مەرسومی، پسپۆڕی ئابووری ڕایگەیاند: ژمارەی فەرمانبەرانی هەمیشەیی دەگاتە چوار ملیۆن و 500 هەزار کەس، کە دەکاتە لە 9% دانیشتووان، ئەگەر خانەنشینان و ئەو کەسانەی لە مووچەی چاودێریی کۆمەڵایەتی سوودمەند دەبن زیاد بکەین، ژمارەکە دەگاتە 10 ملیۆن کەس کە دەکاتە 25% ی کۆی دانیشتووان.

وێنە گەورەكە: بە تەواوی مووچەخۆرانی عێراق و هەرێمی کوردستانەوە لە 70% ی داهاتی نەوتی عێراق بۆ مووچە تەرخاندەكرێت، ئەو ڕێژەیە بەرزترینە لەسەر ئاستی جیهان.

لەلایەکی دیکەوە: مەها قەتاع، ڕێکخەری ڕێکخراوی نێودەوڵەتیی کار لە عێراق دەڵێت: لە 40% ی ژنان لە عێراق کاردەکەن و ئەوانیش لە کەرتی گشتییدان، زۆرینەشیان لە بواری وانە گوتنەوە و خزمەتگوزاریی تەندروستییدا کار دەکەن.

ئەوەی لەبارەیەوە دەگوترێت: ئەمە دەریدەخات کە کەمترین متمانە لەلایەن هاووڵاتییانی عێراقەوە بە کەرتی تایبەت هەیە، بە تایبەت ژنان.