شێخ دارا: هەفتەی داهاتوو زستانە سەختەکە دەستپێدەکات

ئاڤا نیوز

شێخ دارا، شارەزا و پێشکەشکاری کەشوهەوا لە ئاڤا ڕایدەگەیێنێت، لە ڕۆژانی داهاتوو بەفر و تەرزە دەبارێت و ئەگەری دروستبوونی لافاو هەیە.

وێنە گەورەکە: هەفتەی داهاتوو کەشوهەوا گۆڕانکاری بەسەردادێت و دوو شەپۆلی باران هەرێمی کوردستان دەگرنەوە.

لێدوانی فەرمی: شێخ دارا، شارەزای کەشوهەوا و پێشکەشکاری ئاڤا ڕاگەیاند: کاریگەریی شەپۆلی باران لە دەریای سوور و دەریای سپییەوە ڕوو لە هەرێمی کوردستان دەکات، لە ڕۆژی شەممەی هەفتەی داهاتوو شەپۆلی بارانبارینی دەریای سوور دەگاتە عێراق و لە باشووری عێراق نمەباران دەبارێت کاریگەرییەکەی لەسەر هەرێمی کوردستان کەمتر دەبێت، بەڵام لە ڕۆژی سێشەممەی هەمان هەفتە شەپۆلی دووەمی باران لە دەریای سپییەوە دەستپێدەکات و لەسەر هەرێمی کوردستان هەردوو شەپۆلەکە تێکەڵ دەبن و دەبێتە هۆی بارینی باران و تەرزە و دروستبوونی هەورە تریشقە.

باوبۆران و چەخماخە و بارانی بە ڕەهێڵە لەسەرتاسەری هەرێمی کوردستان دەبارێت و لە ڕۆژی چوارشەممەوە ئەگەری دروستبوونی لافاو هەیە کاریگەری شەپۆلەکە لە هەموو شارەکان تا هەینی بەردەوام دەبێت.

هەر بەپێی پێشبینی شێخ دارا، تەنیا لە ڕۆژی سێشەممەی هەفتەی داهاتوو لە هەولێر، 70 ملیم باران دەبارێت، لە سلێمانی 60 ملم و دهۆک 110 ملم باران دەبارێت، لەناوچە شاخاوییەکانیش بەفر دەبارێت، شەپۆلەکە شارەکانی ڕۆژهەڵاتی کوردستانیش دەگرێتەوە.

لەلایەکی دیکەوە: بەڕێوەبەرایەتیی گشتیی کەشناسی و بوومەلەرزەزانی بڵاوی کردووەتەوە، سبەی پێنج شەممە، ئاسمانی هەرێمی کوردستان دەگۆڕێت بۆ هەوری تەواو.

بەرزترین پلەکانی گەرمی پێشبینیکراو بە پلەی سیلیزی بەم شێوەیە دەبێت:

٠ هەولێر: 19 پلەی سیلیزی
٠ سلێمانی: 18 پلەی سیلیزی
٠ دهۆک: 19 پلەی سیلیزی
٠ زاخۆ: 20  پلەی سیلیزی
٠ کەرکوک: 21 پلەی سیلیزی
٠ هەڵەبجە: 19 پلەی سیلیزی
٠ سۆران: 19پلەی سیلیزی
٠ ئاکرێ: 18 پلەی سیلیزی
٠ ئامێدی: 15 پلەی سیلیزی
٠ گەرمیان : 24 پلەی سیلیزی