تیمەكانی شارەوانیی هەولێر بۆ ڕووبەڕووبوونەوەی لافاو خراونەتە حاڵەتی ئامادەباشییەوە

ئاڤا نیوز

لە هەولێر لەپێناو ڕێگریكردن لە دروستبوونی لافاو و كۆبوونەوەی ئاو، ئامادەكاریی پێویست كراوە بۆ هاتنی شەپۆڵێكی چڕی بارانبارین، شارەوانیی هەولێر بەهەماهەنگی بەڕێوەبەرایەتیی خزمەتگوزاری و ژینگەپارێزی و لایەنە پەیوەندیدارەكان، سەرجەم تیمەكانی خستووەتە حاڵەتی ئامادەباشییەوە.

وێنە گەورەكە: بەپێی پێشبینییەكانی كەشناسی، سەرەتای هەفتەی داهاتوو شەپۆڵێكی چڕی بارانبارینی بەلێزمە، هەرێمی كوردستان دەگرێتەوە و چەند ڕۆژێك بەسەریەكەوە بەردەوام دەبێت، سەرۆكایەتیی شارەوانی هەولێر بەهەماهەنگیی بەڕێوەبەرایەتیی خزمەتگوزاری و ژینگەپارێزی و دەزگا پەیوەندیدارەكانی دیكە، لەچوارچێوەی دانانی پلانی وەرزی زستان، لەپاڵ خاوێنكردنەوەی مەنهۆل و چەپەرەكانی ئاو وەرگرتن و فراوانكردنی كەند و ڕێڕەوەكانی ئاوی سرووشتی، ئامادەكاری بۆ هاتنی شەپۆڵێكی چڕی بارانبارین دەكات.

لێدوانی فەرمی: ژیار جەلال، بەڕێوەبەری خزمەتگوزاری و ژینگەپارێزیی هەولێر ڕایگەیاند، سەرجەم تیمەكانی شارەوانی، ئامادەكاریی پێویستیان بۆ هاتنی شەپۆلێكی بارانبارین كردووە، تێیدا بەهاوبەشی لەگەڵ لایەنە پەیوەندیدارەكان، چەندین لیژنە و تیمی شارەزا لەنێو گەڕەک و شەقامەکانی سنووری سەرۆكایەتیی شارەوانیی هەولێر جێگیر دەکات، لەگەڵ چەندین ئامێری قوڕسی فریاگوزاری خێرا، بۆ بەدەنگەوەهاتنی حاڵەتی لەناكاو.

لەلایەكی دیكەوە: سەرۆكایەتیی شارەوانیی هەولێر، هاووڵاتیانی دانیشتووی هەولێر ئاگادار دەكاتەوە، لەکاتی چڕبوونەوەی شەپۆڵەکانی بارانبارین، بۆ هەر پێشهات و ڕووداوێکی نەخوازراو بەهۆی کۆبوونەوەی ئاو یاخود دروست بوونی لافاو  دەتوانن بەزووترین کات پەیوەندی بە تیمەكانی فریاگوزاریی شارەوانیی هەولێر بکەن.