وەزارەتی ژینگە لەسەر بڵاوبوونەوەی بۆنی گۆگرد لە بەغدا ڕوونکردنەوە دەدات

ئاڤا نیوز

بەرەبەیانی ئەمڕۆ شەممە، جارێکی دیکە بۆنی گۆگرد بەشێوەیەکی بەرچاو لە ناوچە جیاجیاکانی بەغدای پایتەخت و سنووری پارێزگای دیالە بڵاوبووەتەوە، وەزارەتی ژینگەش دەڵێت: "بۆ چارەسەرکردنی چاوەڕوانی باران دەکەین".

چیرۆکی سەرەکی: ماوەی چەند هەفتەیەکە ئاسمانی شاری بەغدا بەردەوام لەژێر کاریگەریی بۆنی گۆگرد دایە کە لە کارگەکان و شوێنەکانی کۆکردنەوەی زبڵەوە دەردەچێت، جگە لەوەش، دووکەڵی مۆلیدە ئەهلییەکان و بوونی لانی کەم سێ ملیۆن ئۆتۆمبێل لە شەقامەکاندا، ژینگەی بەغدایان بەجۆرێک پیسکردووە بەردەوام لە پۆڵێنە جیهانییەکان لە ڕیزی پێشەوەی ئەو وڵاتانەیە کە ژینگەکەیان تەواو پیس بووە.

ئەوەی لەبارەیەوە دەگوترێت: چالاکوان وهاووڵاتیان نیگەرانی خۆیان لە دووبارەبوونەوەی ئەم دیاردەیە دەربڕیوە و داوا دەکەن چاودێریی ژینگەیی تووندتر بکرێت، هەروەها داوای ئاشکراکردنی هۆکارە ڕاستەقینەکانی دووبارە دەرکەوتنەوەی ئەم بۆنە نامۆیە دەکەن لە گەڕەکەکانی پایتەختدا.

بڵاوکراوەی فەرمی: وەزارەتی ژینگە لە ڕاگەیەندراوێکدا ئاماژەی بەوە کرد، بەغدای پایتەخت تووشی قەیرانێکی گەورەی پیسبوونی ژینگە نەبووەتەوە و ئەو شەپۆلە بارانبارینەی پێشبینیکراوە لەچەند ڕۆژی داهاتوودا کاریگەریی ئەرێنی دەبێت و نابێتە هۆی دروستبوونی هیچ مەترسی و ئاسەوارێکی نەرێنی.

ئەمەش بزانە: بۆ چارەسەرکردنی قەیرانی پیسبوونی کەش و هەوای بەغدا، چەندین کۆبوونەوەی فراوان و بەپەلە لەسەر ئاستی باڵا لەئەنجوومەنی وەزیرانی عێراق و پارێزگای بەغدا، بەڵام تاوەکو ئێستا دەرەنجامی نەبووە.