شێخ دارا: بارانبارین ماوەی هەفتەیەک بەردەوام دەبێت

ئاڤا نیوز

لە ئەمڕۆوە بارانبارین لە ناوچە جیا جیاكانی هەرێمی كوردستان و عێراق دەستپێدەكات و تاوەكو شەممەی داهاتوو بەردەوام دەبێت، لەناوەڕاستی ئەم هەفتەیەش بەهۆی چڕبوونەوەی شەپۆلەكە و دروستبوونی ڕەشەبا، ئەگەری ڕوودانی لافاو دەكرێت.

لێدوانی فەرمی: شێخ دارا، پێشكەشكاری پێشبینییەكانی كەشناسی لە ئاڤا ڕایگەیاند، وەك ئەوەی پێشووتر موژدەی بارانبارینمان بە خەڵكی كوردستان دابوو؛ ئەمڕۆ كاریگەرییەكانی شەپۆلەكەی باشوور كە لە دەریای سوورەوە دێتە ناوچەكە و بەدیاریكراوی هەرێمی كوردستان، لە ئەمڕۆ شەممەوە بارانبارین دەستپێدەكات تاوەكو شەممەی داهاتوو بەردەوام دەبێت.

- شێخ دارا ئاماژەی بەوەشكرد، لە ناوەڕاستی ئەم هەفتەیە، بەهۆی نزیكبوونەوەی شەپۆلێكی دیكەی چڕی دەریای سپی ناوەڕاست و تێكەڵبوونی هەردوو شەپۆلی چڕی دەریای سوور و دەریای سپی ناوەڕاست، ئەگەری دروستبوونی لافاو و ڕەشەبا لە شار و شارۆچكەكانی هەرێمی كوردستان هەیە بەتایبەت لە شاری دهۆك كە پێشبینی بارینی باران بەڕێژەی 300 ملیمەتر دەكرێت.

ئەوەی پێشبینی دەكرێت: ڕێژەی بارانبارینی پێشبینیكراوی ئەمساڵ بەراورد بە دوو ساڵی ڕابردوو زیاتر دەبێت، بەڕاددەیەك؛ پۆند و بەنداوەكانی هەرێمی كوردستان دەبووژێنەوە.

لەلایەكی دیكەوە: دەستەی گشتیی کەشناسی و چاودێریی بومەلەرزەزانیی عێراق ڕایگەیاند: وڵات بەرەو دۆخێکی ناسەقامگیری کەشوهەوا دەڕوات کە تایبەتمەندە بە کاریگەریی هەمەلایەنەی لەسەر هەموو شارەکان و ماوەی درێژخایەنی، جگە لە بارانبارینی بەخوڕ لە هەندێک ناوچە، ئەگەر دروستبوونی لافاویش هەیە.

- دەستەکە ئەوەشی ئاشکرای کردووە: پێشبینی دەکرێت لە هەندێک شاردا بارانێکی زۆر ببارێت، ئەمەش ڕەنگە ببێتە هۆی بەرزبوونەوەی ئاستی ئاو لە ناوچە کەم خزمەتگوزارییەکان، هەروەها مەترسی لافاوێکی خێرا لە دۆڵەکان و لێوارەکان و ئەو ناوچانەی کە ئاوەڕۆیان سنووردارە، هەیە.