شێخ دارا: ئەم هەفتەیە بارانی بەخوڕ دەبارێت

ئاڤا نیوز

شەپۆلێکی بەفر و باران ڕوو لە هەرێمی کوردستان دەکات، شێخ دارا پێشکەشکاری کەشوهەوا لە ئاڤا دەڵێت، ئەگەر کارێکی پێویستتان نەبێت لە ڕۆژانی داهاتوو مەیەنە دەرەوە، چونکە بەفر و تەرزە دەبارێت و لەچەند ناوچەیەکیش ئەگەری دروستبوونی لافاو هەیە.

ئەوەی پێشبینی دەکرێت: لە ڕۆژی دووشەممەی ئەم هەفتەیە لە هەرێمی کوردستان کەشوهەوا گۆڕانکاری بەسەردادێت و دوو شەپۆلی باران سنوورەکە دەگرنەوە و تا ڕۆژی یەکشەممەی هەفتەی داهاتوو کاریگەرییەکەی دەمێنێتەوە.

لێدوانی فەرمی: شێخ دارا، شارەزا و پێشکەشکاری کەشوهەوا لە ئاڤا دەڵێت: کاریگەریی شەپۆلی بارانی دەریای سوور دەرکەوتووە لە ڕۆژی دووشەمەوە کاریگەرییەکەی زیاتر دەردەکەوێت و لە سێشەممەوە کاریگەری شەپۆلی دەریای سپیش لەسەر ناوچەکانی هەرێمی کوردستان دەردەکەوێت، تا هەفتەی داهاتوو شەپۆلەکە کاریگەرییەکانی دەمێنیتەوە.

شێخ دارا، گوتیشی ڕۆژانی دووشەممە و سێشەممەی ئەم هەفتەیە، لە دهۆک، هەڵەبجە، زاخۆ، سلێمانی و هەولێر ئەگەری دروستبوونی لافاو هەیە، لەبەرئەوە ئەگەر کارێکی پێویستتان نەبێت لە ڕۆژانی داهاتوو مەیەنە دەرەوە، چونکە بەفر و تەرزە دەبارێت.

هەر بەپێی پێشبینی شێخ دارا، باوبۆران و هەورە بروسکە و بارانی بەخووڕ لە سەرتاسەری هەرێمی کوردستان دەبارێت و لەچیاکانی دەوروبەری حاجی ئۆمەران، پشدەر، گارە و پێنجوین بەفر دەبارێت.

لەلایەکی دیکەوە: بەڕێوەبەرایەتیی گشتیی کەشناسی و بوومەلەرزەزانی بڵاوی کردووەتەوە، سبەی یەکشەممە، ئاسمانی هەرێمی کوردسان، هەور و باراناوی دەبێت. باران بارین بە شێوەی نمە باران و بارانی مامناوەند سەرەتا لە بەشی ڕۆژئاوا دەست پێ دەکات پاشان هەموو ناوچەکان دەگرێتەوە .

بەرزترین پلەکانی گەرمی پێشبینیکراو بە پلەی سیلیزی بۆ ئەم ناوچانە بەم شێوەیە دەبێت:

٠ هەولێر: 21 پلەی سیلیزی
٠ سلێمانی: 19 پلەی سیلیزی
٠ دهۆک: 19 پلەی سیلیزی
٠ زاخۆ: 19 پلەی سیلیزی
٠ کەرکوک: 22 پلەی سیلیزی
٠ هەڵەبجە: 20 پلەی سیلیزی
٠ گەرمیان : 23 پلەی سیلیزی