دارایی عێراق: هەموو شایستە داراییەکانی مووچەخۆران پارێزراون

ئاڤا نیوز

وەزارەتی دارایی فیدراڵی دووپاتی دەکاتەوە، بڕی خەرجیی پارەی مووچەخۆران مانگانە هاوتایە لەگەڵ داهات و دووپاتی دەکاتەوە هەموو شایستە داراییەکان بە تەواوی پارێزراون و مسۆگەرن.

چیرۆکی سەرەکی: یەکێک لە پەرلەمانتارانی عێراق لە دیدارێکی تەلەڤزیۆنی بانگەشەی ئەوەی کرد کە قەبارەی خەرجیی مووچە مانگانە دەگاتە 8.5 تریلیۆن دینار لە کاتێکدا داهاتی تەنیا شەش تریلیۆن دینارە، وەزارەتی دارایی لە ڕاگەیێنراوێکدا ئەو قسانەی ڕەتکردەوە. 

ڕاگەیێنراوی فەرمی: وەزارەتی دارایی عێراق ڕایگەیاند: وەزارەت بە تووندی ئەو بانگەشانە ڕەتدەکاتەوە کە باس لە داهات و خەرجی دەکەن. وەزارەتەکە پشتڕاستی دەکاتەوە، "بە ئامارە فەرمییە بەڵگەدارەکان، کە کۆی خەرجییەکانی مووچە، کە بریتین لە (فەرمانبەران، خانەنشینان، و تۆڕی چاودێریی کۆمەڵایەتی) دەگاتە شەش ترلیۆن دینار مانگانە و بڕەکە لەگەڵ بڕی داهات هاوتایە.

گۆشەیەکی دیکەی دیمەنەکە: وەزارەتەکە ئاماژەی بەوەشکرد، "وادەی خەرجکردنی خانەنشینی و چاودێری کۆمەڵایەتی بۆ ڕۆژی (2)ی هەموو مانگێک دیاریکردووە لەبری ڕۆژی 17ی مانگ.