ئایا ئاوی مێخەک لە ڕێکخستنی شەکرە و کەمکردنەوەی هەوکردن ڕۆڵی دەبێت؟

ئاڤا نیوز

تازەترین توێژینەوەی تەندروستی دەڵێت، ئاوی مێخەک بەهۆی بوونی ئاوێتەی یوجینۆڵ لە پێکهاتەکەیدا سەرچاوەیەکی تەندروستی باشە کە وادەکات دژەئۆکسان و دژی هەوکردن بێت، لە هەمانکاتیشدا بەڕێژەیەک دەتوانێت ئاستی شەکر کۆنتڕۆڵ بکات.

ڕاگەیێنراوی فەرمی: ماڵپەڕی ڤێری وێل هێڵس ئەنجامی توێژینەوەیەکی لەبارەی ئاوی مێخەک بڵاوکردووەتەوە، ئەنجامی توێژنەوەکەش ئەوەی خستووەتەڕوو، یوجینۆڵ کە  ئاوێتەیەکە لەناو مێخەکدا هەیە و چەندین سوودی هەیە، بەجۆرێک لەڕێگەی دابەزاندنی شەکر هاوکاری ڕێكخستنی گلوکۆزی خۆراک دەکات، کۆلیسترۆڵیش باشتر دەکات و جگەر و گورچیلەش لە زیانەکانی بەرزبوونەوەی شەکر لە خوێندا دەپارێزێت.

- توێژینەوەکە داوا دەکات ئەم ڕێنماییە تەنیا وەک بژاردەیەکی سوودبەخش بەکاربهێنرێت و بەهیچ شێوەیەک نابێت بکرێت بە جێگرەوەی بەکارهێنانی دەرمانی تایبەت بەم نەخۆشییانە.

مەترسییە پێشبینیکراوەکان: سەرەڕای سوودەکانیشی بۆ کەسانی تەندروست، بەڵام مێخەک لە ئاستی چڕیی بەرزدا، بەتایبەتی لە شێوەی ڕۆندا دەکرێت بۆ منداڵان مەترسی تەندروستی دروستبکات، بەتایبەتیش لەسەر جگەر، گورچیلە و مەترسی توشبوون بە بورانەوە، چوونە کۆما و خوێنبەربوون.

 - هاوکات پێویستە ژنانی دووگیان و شیردەریش لەم بابەتە وریا بن، چونکە زانیاری تەواو نییە لەسەر کاریگەرییەکانی بەکارهێنانی مێخەک و زەیتی مێخەک لەسەریان.