شێخ دارا: شەپۆلی بارانبارین تا هەفتەی داهاتوو بەردەوام دەبێت

ئاڤا نیوز

شەپۆلێکی بارانبارین هەرێمی کوردستان و ناوچەکەی گرتووەتەوە، بەپێی پێشبینییەکانی شێخ دارا، ئەو شەپۆلە تاوەکو هەفتەی داهاتوو بەردەوام دەبێت. هەروەها لە سەنتەری شاری دهۆک ئەگەری بەفربارین هەیە.

وێنە گەورەکە: بەپێی پێشبینیەکانی کەشناسیی هەرێمی کوردستان لە ئەمڕۆوە شەپۆلێکی بارانبارین تەواوی هەرێمی کوردستان دەگرێتەوە، پێشبینی دەکرێت لافاو لە بەشێک لەناوچەکانی هەرێمی کوردستان دروست ببێت.

لێدوانی فەرمی: شیخ دارا، شارەزای کەشناسی و پێشکەشکاری کەشوهەوای ئاڤا میدیا ڕایگەیاند، ئەم شەپۆلی بارانبارینە کە ڕووی لە هەرێمی کوردستان کردووە، تاوەکو هەفتەی داهاتوو بەردەوامی دەبێت، بەڵام بەشێوەی پچڕ پچڕ.

ئاماژەی بەوەشدا، بارانەکە لە ڕۆژانی دووشەممە و سێشەممە و چوارشەممەی ئەم هەفتەیە بەشێوەی چڕ دەبارێت و لە هەندێک شار و ناوچەدا ئەگەری دروستبوونی لافاو دەبێت.

زانیاریی زیاتر: بەپێی زانیارییەکانی شێخ دارا، چلەی زستان لە ئەمڕۆوە دەستیپیکردووە و کە ئەمساڵ 39 ڕۆژ دەخایەنێت و تاوەکو 20-1-2026 بەردەوام دەبێت.

ئەوەی پێشبینی دەکرێت: شێخ دارا پێشبینی ئەوە دەکات، شەوی سێشەممە لەسەر چوارشەممەی ئەم هەفتەیە لە سەنتەری شاری دهۆک بەفر ببارێت. دەشڵێت، ئێستا لە حاجی ئۆمەران و چیای گارە و سپیلک و دەوروبەری پێنجوێن و چەندین ناوچەی دیکەی شاخاوی بەفر بە چڕی دەبارێت.