بەڕێوەبەرایەتیی ئاوی نەینەوا داوا دەکات هاووڵاتیان ئاو پاشەکەوت بکەن

ئاڤا نیوز

بەڕێوەبەرایەتیی ئاوی نەینەوا داوای لە هاووڵاتیان دەکات بڕی پێویست لە ئاو پاشەکەوت بکەن، ئەمەش بەهۆی ئەگەری وەستانی کاتیی وێستگەکانی پاڵاوتنی ئاو، چونکە لافاوە لێڵەکان بەرەو پارێزگاکە دێن.

وێنە گەورەکە: دەستەی گشتیی کەشناسی و چاودێریی بومەلەرزەزانیی عێراق ڕایدەگەیێنێت، وڵات بەرەو دۆخێکی ناسەقامگیری کەشوهەوا دەڕوات کە تایبەتمەندە بە کاریگەریی هەمەلایەنەی لەسەر هەموو شارەکان، جگە لە بارانبارینی بەخوڕ لە هەندێک ناوچە ئەگەرغ دروستبوونی لافاویش هەیە.

ڕاگەیێنراوی فەرمی: بەڕێوەبەرایەتییەکە لە ڕاگەیێنراوێکدا ڕایگەیاند: "داواتان لێدەکەین بڕێکی پێویست لە ئاو پاشەکەوت بکەن کە بەشی 2 ڕۆژ بکات، هاوکات ئاو کەم بەکاربهێنن بۆ دڵنیابوون لە بەردەوامیدانی دابینکردنی ئاو لە کاتی پێویستدا."

ئەوەی پێویستە بیزانیت: بەڕێوەبەرایەتییەکە ڕوونیکردەوە کە ئەم داوایە بەهۆی ئەگەری وەستانی هەندێک پڕۆژەوە دێت، چونکە "لێڵبوونی ئاو" کە لە دەشت و دۆڵەکانەوە بەرەو وێستگەکانی ڕاکێشانی ئاو دێت، بەرزبووەتەوە، ئەمەش ناچاریان دەکات کە بەشێوەیەکی کاتیی ئاو پەمپ نەکەن.