هەسەدە: هیچ دادپەروەرییەک لە سووریا بەدی نایەت تا ئاوارەکانمان نەگەڕێنەوە سەر ماڵەکانیان

ئاڤا نیوز

بەبۆنەی تێپەڕبوونی ساڵێک بەسەر ڕووخانی ڕژێمی بەعسی سووریا، هێزەکانی سووریای دیموکرات ڕاگەیێنراوێکی بڵاوکردەوە، تێیدا هاتووە، تا ئاوارەکانی عەفرین و گرێ سپی و سەرێ کانی نەگەڕێنەوە سەر ماڵەکانیان دادپەروەری بەدی نایەت.

چیرۆکی سەرەکی: ئەمڕۆ دووشەممە، ساڵێک بەسەر ڕووخانی ڕژێمی بەشار ئەسەد تێدەپەڕێت، بەم بۆنەیەوە هەسەدە ڕاگەیێنراوێکی بڵاوکردووەتە و دەڵێت، لە سووریا دادپەروەری بەدی نایەت تا ئاوارەکانمان نەگەڕێنەوە سەر ماڵەکانیان.

ڕاگەیێنراوی فەرمی: فەرماندەیی گشتی هێزەکانی سووریای دیموکرات (هەسەدە) ڕاگەیێنراوێکی بڵاوکردەوە، لە بەشێکی ڕاگەیێنراوەکە هاتووە، پیرۆزبایی لە خەڵکی سووریا دەکەین و بە ڕووداوێکی سەرەکی لە مێژووی سوریای هاوچەرخی دەزانین. ڕووخانی ڕژێمی ئەسەد دەرئەنجامی دەیان ساڵەی ستەمکاری و تاوانکارییە کە دژی گەلی سوریا ئەنجامدراوە، ئەمەش تەنیا  پێشهاتێکی سیاسی ڕاگوزەر نییە.

دەشڵێت، لەگەڵ ئەوەی ڕژێمی بەعس کۆتایی هاتووە، هێشتا سەدان هەزار ئاوارە لە عەفرین، گرێ سپی و سەرێ کانی بێ بەشن لەمافی گەڕانەوە بۆسەر ماڵ و حاڵی خۆیان. ئەم پرسە وەک کاری لە پێشینەمان دەمێنێتەوە، هیچ چارەسەرێکی سیاسی دادپەروەرانە بەدی نایەت مەگەر گەڕانەوەی شکۆمەندی لەخۆ بگرێت.

لە ڕاگەیێنراوەکەی هەسەدە ئەمانەش هاتوون:

٠ ناوچەکانی باکوور و ڕۆژهەڵاتی سووریا لە پێشەنگی شکاندنی دەستە ئەمنی و سەربازییەکانی ڕژێمی بەعسن لە هەردوو مێژوویی ڕاپەڕینی 12ـی ئازاری 2004 و ساڵی 2012 کاتێ هێزەکانی ڕژێمی بەعس دەرکران.

٠ خەڵکی باکووری ڕۆژهەڵاتی سووریا دامودەزگا ئەمنییەکانی ڕژێمیان دەرکرد و ئیدارەیەکی دیموکراسی و مۆدێلێکی جیاوازی حوکومڕانی ناوخۆییان دامەزراند.

٠ لەگەڵ دەستپێکی خۆپیشاندانەکان یەکینەکانی پاراستی گەل (یەپەگە) دروستکرا و ناوەکەی بۆ هێزەکانی سووریای دیموکرات گۆڕا. هەزاران شەهیدیان لە پێناو بەرگری و ڕزگاری بەخشیووە، ئێستا بوونەتە کاریگەرترین و پیشەیترین هێز لە ڕووبەڕووبونەوەی تیرۆردا، هەربۆیە شەرعیەتی هێزەکانمان لە قوربانیدانی گەلەکەمان و خۆڕاگریمان بەرامبەر تیرۆر و بونیادنانی مۆدێلێکی مەدەنی سەرچاوەی گرتووە.

٠ دووپاتی دەکەینەوە، شکستی داعش و ڕزگارکردنی خاکی سووریا، لەلایەن خەڵکی ناوچەکەوە بەناوی هەموو جیهان کردوویانە.

٠ دەرکردنی دامودەزگاکانی ڕژێمی بەعس لەناوچەکانی باکوور و ڕۆژهەڵاتی سووریا وایکرد دەسەڵات و هەژموونیان لە ناوچەکە تێکبشکێت و تواناکانی لاواز کرد.

٠ ڕووخانی دەسەڵاتی بەعس ڕووخانی ئەو عەقڵیەتە بوو کە لەسەر بنەمای قۆرخکردنی دەسەڵات و پشتگوێخستنی ئیرادەی گەل دامەزرا بوو.

٠ بەرهەمهێنانەوەی ئەم جۆرە عەقڵیەتە بە مانای گەڕانەوەی سووریایە بۆ هەمان کارەساتی پێشوو کە باجێکی قورسی بۆ دراوە.

٠ بەکارهێنانی زمانی هاندان بۆ ڕق و کینە لەلایەن هەندێک کەسی ناو دەسەڵاتی سووریا تا ئێستاش بەردەوامە، هەوڵی هەمان سیاسەتی دابەشکاری دەدەن. ئەم جۆرە گوتارە قبوڵکراو نییە، ناتوانێت ببێتە بنەمای نیشتمانێکی نوێ، بەڵکو درێژەپێدەری هەمان عەقڵیەتی ڕژێمی پێشووە و هەرگیز ناگەڕێتەوە.

٠ ڕووخانی ڕژێم هەلێکی مێژووییە بۆ هەموو سووریەکان  تا دووبارە نیشتمان بونیادبنێینەوە.

٠ ئێمە دووپاتی دەکەینەوە کە قۆناغی داهاتوو پێویستی بە دەستپێکردنی دیالۆگێکی نیشتمانی ڕاستەقینە و هەمەلایەنە هەیە، دوور لە دوورخستنەوە و تایبەتمەندی و دامەزراندنی گرێبەستێکی کۆمەڵایەتی نوێ کە ماف و ئازادی و یەکسانی گەرەنتی بکات و بە شێوەیەکی یەکلاکەرەوە و بێ دوودڵی ڕێگری لە گەڕانەوەی ستەمکاری بکات.

٠ ئایندە لە ئەمڕۆوە بە زاڵبوون بەسەر عەقڵیەتی دەسەڵاتی کۆن بە هەموو کەرەستە و میتۆدەکانیەوە دەست پێدەکات، هەروەها بوونیادنانی سوریایەکی نوێ لەسەر بنەمای ئازادی و دادپەروەری و شەراکەت، دەوڵەتێکی شایستەی قوربانیدانی شەهیدان و خۆڕاگری ملیۆنان کەس.

٠ لەم کاتە گرنگەدا هێزەکانی سوریای دیموکرات دووپاتی دەکاتەوە کە وەک هێزی سەرەکی بەرگری لە گەلەکەمان دەمێنێتەوە.

٠ هێزەکانمان ڕووبەڕووی هەر دەستدرێژییەک یان هەڕەشەیەک دەبنەوە بۆ سەر ئاسایش و سەقامگیری ناوچەکانی باکوور و ڕۆژهەڵاتی سووریا.

٠ شەڕڤانانمان بە گیانیان ئاڵای ئازادییان هەڵگرتووە و قوربانییان داوە لە بەرگریکردنی کەرامەتی مرۆڤ.

٠ ئێمە ئیلهام لە میرات و ڕێبازی شەهیدەکانمان وەردەگرین، بەرپرسیارێتی خۆمان لە پاراستنی خاک و گەل و پاراستنی دەستکەوتەکانی ساڵانی درێژخایەنی بەرخۆدان جێبەجێ دەکەین.

باکگراوند: ڕۆژی 8-12-2024 هێزەکانی ئۆپۆزسیۆنی سووریا گەیشتنە ناو دیمەشق و توانیان دەسەڵاتی زیاتر لە پەنجا ساڵەی بنەماڵەی ئەسەد بڕوخێنن. دوای ساڵێک ئەگەرچی چەندین دانیشتن لەنێوان هەسەدە و دەسەڵاتی نوێی سووریا هەبوو، بەڵام هێشتا هیچ هەنگاوێکی کرداری بۆ ئەم ڕێککەوتنە نییە.