کەشناسیی عێراق: تا یەکشەممەی داهاتوو بارانبارین بەردەوام دەبێت

ئاڤا نیوز

دەستەی گشتی کەشناسی، پێشبینییەکانی کەشوهەوای لە عێراق بۆ چەند ڕۆژی داهاتوودا ڕاگەیاند و ئاماژەی بەوەکرد، پلەکانی گەرما دادەبەزن و بارانبارین بە ئاستی جیاواز لە سەرتاسەری وڵات بەردەوام دەبێت.

ڕاگەیێنراوی فەرمی: بەگوێرەی دەستەی گشتیی کەشناسیی عێراق دۆخی کەشوهەوا لە زۆربەی ناوچەکانی عێراق و هەرێمی کوردستان بەم جۆرە دەبێت؛ کەشوهەوا هەور و نیمچە هەور دەبێت لەگەڵ ئەگەری بارینی بارانێکی کەم و هەندێکجار هەورە تریشقە دەبێت لە ناوچەکانی هەرێمی کوردستان و باشوور. بەرەبەیانی زوو لە زۆربەی شارەکانی وڵات تەم دروست دەبێت و وردە وردە نامێنێت. پلەکانی گەرما لە ناوچەکانی ناوەڕاست و باشوور هاوشێوە دەبن و لە ناوچەکانی هەرێمی کوردستان کەمێک بەرز دەبنەوە. بینینی ئاسۆیی (5-7) کم دەبێت، و لە تەم و باران (2-4) کم دەبێت، بەڵام لە هەندێک ناوچە کە تەم دروست دەبێت لەوانەیە بگاتە کەمتر لە یەک کیلۆ مەتر.

باکگراوند: لە نیوەشەوی شەممەوە شەپۆلێکی بارانبارین ناوچەکانی عێراق و هەرێمی کوردستانی گرتووەتەوە و چەند ڕۆژێک بەردەوام دەبێت کە بە بەهێزترین شەپۆلی بارانبارین بەراورد بە ساڵانی ڕابردوو دادەنرێت.