شێخ دارا: شەپۆلێکی دیکەی بەفر و باران هەرێمی کوردستان دەگرێتەوە

ئاڤا نیوز

بەپێی پێشبینییەکان شەپۆلی بارانبارین تا ڕۆژی شەممە بەردەوام دەبێت، شێخ دارا دەڵێت،  شەپۆلێکی دیکەی بەفر و باران ناوچەکە دەگرێتەوە.

چیرۆکی سەرەکی: ماوەی دوو ڕۆژە شەپۆلێکی بارانبارین هەرێمی کوردستانی گرتووەتەوە و لە هەندێک ناوچەش یەکەم بەفری ئەمساڵ باریوە.

لێدوانی فەرمی: شێخ دارا، پێشکەشکاری کەشوهەوای کەناڵی ئاڤا ڕایگەیاند، ئێمە پێشتر ئاماژەمان بەو شەپۆلە باران و بەفر بارینە سەرتاسەرییە دابوو، 50 ساڵە کەشوهەوا بەمجۆرە نەبووە.

ئاماژەی بەوەشدا، بڕی بارانبارین دڵخۆشکەرە، لە ناوچە جیاوازەکان لە 50 ملم تا 150 ملم زیاتر باریوە، لەم مانگەدا لە سەرتاسەری کوردستان پەلە دەدات.

شێخ دارا ئەمانەشی وت:

٠ ناوچەکانی گەرمیان بڕی پێویستی خۆی بارانی لێ باریوە، چونکە ئەو ناوچانە لە دەربەندیخان بەرەو خوارەوە، 150ملم تا 250 ملم بارانی لێ ببارێت پێیدەگوترێت بارانی مسۆگەر.

٠ بەنداوی دێوانە سەرڕێژ بووە، ئەگەر هەیە هەردوو بەنداوی دووکان و دەربەندیخان بڕێکی زۆری ئاوی باران گلبدەنەوە، بەڵام دیار نیە سەرڕێژ دەبن یان نا.

٠ تا دوو ڕۆژی دیکە کاریگەری ئەم شەپۆلە و ئەم کەشوهەوایە بەردەوام دەبێت و تا ڕۆژی شەممە بە پچڕپچڕی باران بارین بەردەوام دەبێت.

٠ ئەگەر هەیە لە دوای ڕۆژی شەممەوە شەپۆلێکی دیکەی بەفر و باران بێتەوە ناوچەکەمان.