ئیدارەی گەرمیان لیژنەی تایبەتمەند بۆ تۆمارکردنی زەرەر و زیانەکانی لافاو پێکدەهێنێت

ئاڤا نیوز

سەرپەرشتیاری ئیدارەی گەرمیان پەیامێکی لەبارەی لافاو بڵاوکردەوە و دەستخۆشی لە یەکە ئیدارییەکان کرد بۆ ڕزگارکردنی گیانی 36 هاووڵاتی سنوورەکە.

چیرۆکی سەرەکی: لە دوو ڕۆژی ڕابردوو شەپۆلێکی بەهێزی بارانبارین ڕووی لە هەرێمی کوردستان کرد، بەمەش لە چەندین شوێن و ناوچەدا لافاو دروست بوو و زیانی گیانی و ماڵی بەدوای خۆیدا هێنا، لە گەرمیانیش لە چەندین شوێن لافاو دروست بوو، بەڵام بەبێ زیانی گیانی تێپەڕی.

پەیامی فەرمی: جەلال شێخ نووری، سەرپەرشتیاری ئیدارەی گەرمیان پەیامێکی بڵاوکردەوە و ڕایگەیاند، بەبۆنەی تێپەڕینی مەترسییەکانی لافاو لە سنوورەکەمان بەبێ زیانی گیانی، "دەستخۆشی لە یەکە ئیدارییەکان و بەڕێوەبەرایەتیی گشتیی شارەوانییەکانی گەرمیان، تەواوی دامودەزگا خزمەتگوزارییەکان دەکەم کە رۆڵی جوامێرانەیان بینی لە رووبەڕووبوونەوەی مەترسییەکانی لافاو و رزگارکردنی 36 هاووڵاتی لە مردن، هەروەها کردنەوەی رێگاکان و پاراستنی ئۆتۆمبێل و ماڵی هاووڵاتیان و تێپەڕینی دۆخەکە بەبێ زیانی گەورە و کارەساتی ناخهەژێن".

زانیاریی زیاتر: لە بەشێکی دیکەی پەیامەکە هاتووە، لە ئەمڕۆوە لە سەرجەم یەکە ئیدارییەکاندا لیژنەی تایبەتمەند پێکدەهێنرێت بۆ تۆمارکردنی زەرەر و زیانەکانی لافاو و ئامادەکردنی ئامارێکی دروست لەوبارەیەوە، بەمەبەستی بەهاناوەچوون و کارکردن بۆ قەرەبووکردنەوەی زیانلێکەوتوان.