سوودانی شەش دۆسیە لەگەڵ ئیدارەی بایدن تاوتوێ دەکات

 

ئاڤا نیوز

نووسینگەی سەرۆکوەزیرانی عێراق تەوەرەکانی سەردانی سوودانی بۆ واشنتن بڵاودەکاتەوە و ڕایدەگەیێنێت، شەش دۆسیە لەگەڵ ئیدارەی بایدن تاوتوێ دەکات.

وێنە گەورەکە: محەممەد شیاع سوودانی، سەرۆكوەزیرانی عێراق بەسەرۆکایەتیی شاندێکی حکومی و کەرتی تایبەت بە سەردانێکی فەرمی بەرەو ئەمریکا بەڕێکەوتووە،  بڕیارە 15ی ئەم مانگە لە کۆشکی سپی لەگەڵ جۆ بایدن کۆببێتەوە.

ڕاگەیێنراوی فەرمی: نووسینگەی سوودانی بڵاوی کردووەتەوە، لەگەڵ ئیدارەی بایدن گفتوگۆ لەبارەی دۆسیەکانی: ئابووری، دارایی، بازرگانی، ئەمنی، فێركاری و ڕۆشنبیری دەکرێت، لەگەڵ دۆخی ناوچەکە و دوایین پەرەسەندنە ئەمنییەکان.

زانیاریی زیاتر: هەروەها گفتوگۆ لەبارەی كاری لیژنەی سەربازیی باڵای نێوان عێراق و هاوپەیمانیی نێودەوڵەتی دەکرێت، سوودانی لەگەڵ لیژنەی هەماهەنگی باڵا (HCC) کۆدەبێتەوە. 

لەلایەکی دیکەوە: سوودانی لە سەردانەکەیدا ژمارەیەك گرێبەستی وەبەرهێنان لەگەڵ گەورە كۆمپانیاکانی ئەمریكا واژۆ دەکات.