بەهای 100 دۆلار گەیشتە سەرووی 146 هەزار

ئاڤا نیوز

 

دوو ڕۆژە لە بازاڕەکانی کوردستان و عێراق شڵەژان لە بازاڕی ئاڵوگۆڕی دراو دروست بووە و بەهای دۆلار بەرامبەر دینار زیاتر بەرزبووەتەوە. بەجۆرێک ئەمڕۆ لە هەولێر 100 دۆلار تا زیاتر لە 145 هەزار و لە بەغداش 146 هەزاری تێپەڕاند.

 

چیرۆکی سەرەکی: لە هەولێر و سلێمانی و دهۆک 100 دۆلار بەرامبەر 144 هەزار و 850 دینار بوو. ئەمڕۆ لە هەولێر تا زیاتر لە 145 هەزار و لە بەغداش 146 هەزاری تێپەڕاند. پێش سەری ساڵ 100 دۆلار بەرامبەر 141 تا 142 هەزار دینار بوو. ئەمەش واتە لەماوەی سێ بۆ چوار ڕۆژ  هەر 100 دۆلارێک سێ بۆ پێنج هەزار گران بووە.

هۆکارە زانراوەکان: لەبارەی هۆکارەکەی، غازی جەعفەر، ئەنجومەنی بازاڕی دۆلارەکەی هەولێر بە ئاڤای گوت، ئەم چەند ڕۆژ بەهۆی پشووی سەری ساڵ بازاڕی ئاڵوگۆڕی دراو نەبوو، بۆشاییەکی زۆر هەبوو، ئەمە وای کرد هەر کە بۆرسە کرایەوە خەڵکێکی زۆر کتوپڕ ڕوو لە کڕینی دۆلار بکەن، ئەمەش بەهاکەی بەرز کردەوە.

لە سلێمانیش جەبار گۆران، وتەبێژی بازاڕی دۆلارەکە بە ئاڤای گوت: خواستێکی ناسرووشتی بۆ کڕینی دۆلار هەیە، چەند هۆکارێک هەن، یەکێک لەوانە پەیوەندی هەیە بەو لێدوانانەی حکومەتی عێراق دەیدات سەبارەت بە نرخی نەوت و کورتهێنان لە بودجە.

 

لەلایەکی دیکە: دکتۆر مستەفا مەلا حەسەن، پێشکەشکاری زەنگی بازاڕی ئاڤا دەڵێت چەند هۆکارێک هەیە بۆ بەرزبوونەوەی بەهای دۆلار:

یەکەم: سەپاندنی پێناسی گومرگی بە ڕێژەی سەدا 15 لەسەر ئۆتۆمبێل لەلایەن حکومەتی عێراق، ئەمە وادەکات کاریگەری لەسەر نرخی ئەو ئۆتۆمبێلانە هەبێ کە دەهێنرێنە عێراق بێگومان کاریگەریشی لەسەر بەهای دۆلار دەبێت.

دووەم: ترس لە دەستکاریکردنی نرخی فەرمی دینار لەلایەن حکومەتی عێراق. ئەمەش بەو ئامانجەی کورتهێنانەکانی پڕ بکاتەوە، پێشتر ئاڤا ڕایگەیاندبوو  حکومەتی عێراق تووشی قەیرانێکی گەورەی دارایی بووە، یەکێک لە فکرەکان ئەوەیە بەهای فەرمی 100 دۆلار لە 132هەزار دینارەوە بەرز بکەنەوە بۆ 150 بۆ 180 هەزار دینار.

سێیەم هۆکار جیاوازییە لە نرخی دۆلاری شین و دۆلاری سپی. ئەو دۆلارەی شینە نرخەکەی گرانترە و ئەوەی سپییە بە هەرزانتر وەردەگیرێت، ئێ ئەمەش ناسەقامگیری دروست دەکات، ئەمە وادەکات بەهای دۆلار بەرز و نزم بکات.