بەهۆی شەپۆلێکی نوێی بەفر و بارانەوە گرفتی هاتووچۆ لە چەند ناوچەیەک دروست بووە

ئاڤا نیوز

شەپۆلێکی نوێی بارینی بەفر و باران ڕووی لە هەرێمی کوردستان کردووە و بەهۆیەوە لە چەند ناوچەیەک گرفتی هاتووچۆ دروستبووە، بەپێی پێشبینییەکانی کەشناسی هەرێمی کوردستان بێت، شەپۆلەکە تا سبەی شەممە بەردەوام دەبێت و لە ناوچە سنوورییەکان بەفربارین بەردەوام دەبێت.

لێدوانی فەرمی: شێخ دارا، شارەزای کەشناسی و پێشکەشکاری ئاڤا میدیا دەڵێت: سبەی شەممە بارانی بە لێزمە دەبارێت، پێویستە هەموو لایەنە پەیوەندیدارەکان ئامادەکاری بۆ بکەن، چونکە ئەگەری بوونی لافاو لە هەندێ ناوچە هەیە، زۆرترین بارانیش لە سنووری دهۆک دەبارێت و بەفریش ناوچە شاخاوییەکان دەگرێتەوە.

بەدواداچوونی ئاڤا: ئاڤا بەدواداچوونی کردووە، بەهۆی بارینی بەفر و بارانەوە لەم ناوچانە گرفتی هاتووچۆ دروستبووە:

٠ لە سەر رێگای زینی وەرتێ، زینەتیر - بالیسان، سۆران - سیدەکان  تا مەرزی حاجی ئۆمەران بەفرێکی زۆر باریوە و بەفربارین بەردەوامە و بەهۆیەوە گرفت بۆ هاتووچۆی بارهەڵگرەکان دروست بووە. بەڕێوەبەرایەتیی چاککردنەوە و پاراستنی رێگەوبانی سۆران بڵاوی کردووەتەوە لەلایەن تیمەكانیی ڕاماڵینی بەفر بەردەوامن لە پاککردنەوەی ڕێگا سەرەکییەکانی سنورەکە.

٠ لەدەروازەی قەزای خەلیفان دەیان ئۆتۆمبێل گیریان خواردووە.

٠ لەناو هەولێر بەهۆی پەنگخواردنەوەی ئاو لە چەند شەقامێکدا گرفتی هاتووچۆ دروست بوو.

٠ لە ئاکرێ لە ڕێگای پێریس بەهۆی زۆری بەفربارینەوە چەندین ئۆتۆمبێل گیریان خواردووە.

٠ بەهۆی داڕمانی چیای هەیبەت سوڵتان لە لۆفەکاندا گرفتی هاتووچۆ دروست بووە.

زانیاریی زیاتر: هەر بەپێی پێشبینی کەشناسی هەرێمی کوردستان، بەرزترین پلەکانی گەرمای پێشبینیکراو بە پلەی سیلیزی بۆ سبەی شەممە بەم شێوەیە دەبێت:

هەولێر 13 پلەی سیلیزی
پیرمام 9 پلەی سیلیزی
سۆران 5 پلەی سیلیزی
حاجی ئۆمەران 2 پلەی سیلیزی
سلێمانی 10 پلەی سیلیزی
چەمچەماڵ 13 پلەی سیلیزی
دهۆک 11 پلەی سیلیزی
زاخۆ 10 پلەی سیلیزی
کەرکووک 14 پلەی سیلیزی
هەڵەبجە  10 پلەی سیلیزی
گەرمیان 16  پلەی سیلیزی