ڕۆچوونی زەوی تەنگ بە پارێزگایەکی تورکیا هەڵدەچنێت و 700 چاڵی لێ دروست کردووە

 

 

دروستبوونی چاڵی گەورە لە دەشتێکی شاری کۆنیای تورکیا بەردەوامە، ئەمجارە چاڵێکی نوێ کە تیرەکەی 30 مەترە لەو دەشتە دروست بووە و 30 کیلۆمەتر لە سەنتەری شاری کۆنیاوە دوورە.

 

 

چیرۆکی سەرەکی: لەم ساڵانەی دواییدا لە هەشت قەزای تورکیا، ڕۆچوونی زەوی دروست بوون، تاوەکو ئێستا 700 چاڵ لە دەشتەکانی شاری کۆنیا دروست بووە، ئەمجارە لە یەکێک لە دەشتەکانی ئەو شارە چاڵێک کە تیرەکەی 30 مەترە و قوڵاییەکەی 15 مەترە، لە قەزای کاراپینار دروست دەبووە.

 

 

لێدوانی فەرمی: دکتۆر ئاریف دێلیکان، مامۆستای زانکۆ، لە زانکۆی تەکنیکیی کۆنیا، دەڵێت: "هۆکاری ڕۆچوونی زەوی بۆ گۆڕانی کەشوهەوا، کەمبارانی، کەمبوونەوەی ئاوی ژێرزەویی و کشانەوەی ئاوی ژێرزەویی دەگەڕێتەوە."

 

 

دێلیکان، دەشڵێت: "جووڵەی زەوی (بوومەلەرزە) لە نزیک دەشتی کۆنیا، هۆکارێکی دیکەیە بۆ دروستبوونی چاڵەکان، ئەم بوومەلەرزانە، وادەکەن ئەو خاکەی ئامادەی ڕۆچوونە زووتر ڕۆبچێت."

 

 

ئەمەش بزانە: شارەوانیی کۆنیا دەوروبەری چاڵە نوێیەکەی تێلبەند کردووە و تابلۆی ئاگادارکردنەوەی داناوە، بۆ ئەوەی هیچ کەسێک نزیکی ئەو شوێنانە نەکەوێت کە ڕۆچوونی زەویی لێی ڕوویداوە.