شێخ دارا: دووشەممە بەفر و باران دەستپێدەکاتەوە

ئاڤا نیوز

 

شەپۆلێکی نوێی بەفر و باران هەرێمی کوردستانی گرتووەتەوە و لە ناوچە شاخاوییەکان بەفرێکی زۆر باریوە و لەچەند شوێنێک گرفتی هاتووچۆ دروستبووە، بەگوێرەی پێشبینییەکان شەوی دووشەممە بەفر و باران دەستپێدەکاتەوە.

 

وێنە گەورەکە: شەپۆلێکی دیکەی بارانبارین لە ڕۆژی هەینییەوە دەستیپێکردووە، چڕی بارانبارین لە ناوچەکانی هەولێر و سۆران و ڕاپەڕین بووەتە هۆی بووژانەوەی سەرچاوە ئاوییەکان، هاوکات بەفربارینێکی زۆر لە ناوچە شاخاوییەکان بووەتە هۆی نزمبوونەوەی بەرچاوی پلەکانی گەرما و دروستبوونی تەمومژ.

 

لێدوانی فەرمی: شێخ دارا حەسەن، شارەزای کەشناسی و پێشکەشکاریی ئاڤا میدیا، دەڵێت: "تا دووشەممەی ئەم هەفتەیە کەشوهەوای هەرێمی کوردستان ئاسایی دەبێتەوە کاریگەری ئەو شەپۆلە بەفر و بارانە لەسەر ناوچەکان نامێنێت، بەڵام لە شەوی دووشەممەوە بەفر و باران دەستپێدەکاتەوە و ئەگەری هەیە بەفرەکە لەناو چەند شارێک ببارێت بەتایبەت لە دهۆک، پێنجوێن و سلێمانی و دەوروبەری سنووری پارێزگای هەولێر."

 

لەلایەکی دیکەوە: بەڕێوەبەرایەتیی گشتیی کەشناسی و بومەلەرزەزانی هەرێم بڵاوی کردووەتەوە سبەى یەکشەممە، ئاسمانی هەرێمی کوردستان ساماڵ و نیمچە هەور دەبێت لە هەندێ کات شوێن دەگۆرێت بۆ هەوری تەواو.

 

زانیاریی زیاتر: ئەمساڵ بەراورد بە ساڵی ڕابردوو تا ئەم کاتانە لە زۆربەی ناوچەکانی هەرێمی کوردستان باران دوو هێندە باریوە، چەندین سەرچاوەی ئاو، پۆندەکان و سەر ڕێژبوونی چەندین بەنداوی لێکەوتووەتەوە.