گرووپێک مەلەوان زستانان لە ئاوی سیرواندا مەلە دەکەن

ئاڤا نیوز

 

وەکو وەرزشێکی سەرنج ڕاکێش لە کوردستاندا، کۆمەڵیک کەس لە گەرمیان، لە کەشێکی زۆر سارد و زستانییدا لە ئاوی زۆر ساردی ڕووباری سیروان بە مەلەکردن دەپەڕنەوە و پاشان دەچن بۆ شوێنی کارکردنی ڕۆژانەیان.

 

چیرۆکی سەرەکی: ئاوی سیروان بەوە ناسراوە زۆر ساردە و خوڕە، بەڵام نزیکەی 20 کەس کە زۆرینەیان گەنجن و زۆر مەلەوانن، بەیانیانی زستان، تەنانەت ئەگەر بەستەڵەک و شەختەبێت، بە مەلەکردن لە ڕووبارەکە دەپەڕنەوە و ئاگرێکی گەورە دەکەنەوە بۆ خۆ وشککردنەوە و پاشان چا لێدەنێن و نانی بەیانی دەخۆن و هەر یەکێکیان دەڕۆن بۆ شوێنی کارەکانی خۆیان.

 

زانیاری زیاتر: گرووپە مەلەوانەکە، لە هەفتەیەکدا جارێک یان دوو جار ئەم وەرزشە سەرنچڕاکێشە ئەنجام دەدەن و گوێ بە سەرما نادەن، هەتا سەرمابێ و پلەکانی گەرما زیاتر دابەزن چێژی زیاتر لە مەلەکردن وەردەگرن.

 

دیمەنێکی دیکەی چیرۆکەکە: گرووپەکە بۆ نانی بەیانی نۆکاوی گەرم و هێلکەی کوردی و قەیماخ ئامادە دەکەن.

 

لێدوان: مەریوان حەسەن، یەکێک لە ئەندامانی گروپەکەیە، بە هونەر فارس پەیامنێری ئاڤای وتووە، ئەو وەرزشەی ئەوان دەستیان داوەتێ لەڕوی تەندروستیەوە زۆر سودی پێگەیاندوون، پێشتر چەند کەسێکیان لەگەڵ بووە نەخۆشی فەقەرات و ئینزیلاقیان هەبووە، بەڵام ئێستا چاکبوونەتەوە.