هاوکاری دارایی هاوپەیمانان بۆ مانگی 12 دابەش دەکرێت

ئاڤا نیوز

بڕیارە ڕۆژی پێنجشەممەی داهاتوو، 15-1-2026، نزیکەی 97٪ی ئەفسەر و پلەدار و پێشمەرگەکانی سەر بە وەزارەتی پێشمەرگە هاوکارییە داراییەکانی هاوپەیمانان بۆ مانگی 12 وەربگرن لە ڕێگەی هەژماری بانکییەوە.

 

ڕاگەیێنراوی فەرمی: وەزارەتی پێشمەرگە ڕایگەیاند: ئەمڕۆ 13ـی کانوونی دووەمی 2026، هاوکاریی دارایی هاوپەیمانان بۆ مانگى 12 خرایە سەر هەژماری وەزارەتی پێشمەرگە، لەلایەن بەڕێوەبەرایەتى گشتى بوودجە و بەرنامەکان (ژمێریارى سەربازى) دوای ئەنجامدانی ڕێکارە دارایی و ژمێریارییەکان ڕۆژی پێنجشەممە بەرواری 15ـی کانوونی دووەمی 2026، دەست بە دابەش کردنی دەکرێت.

 

زانیاریی تایبەت: بەپێی زانیارییەکانی ئاڤا، نزیکەی 100 هەزار ئەفسەر و پێشمەرگە هاوکارییەکە وەردەگرن و هەر کەسێکیان بڕی 76 هەزار دیناری پێدەدرێت، سەدا 97 یشیان لەڕێگەی هەژماری من پارەکە وەردەگرن.

 

زانیاری زیاتر: وەزارەتی پێشمەرگە ئەوەشی ئاشکراکردووە، لەم مانگەدا، زیاتر لە 97٪ ئەفسەر و پلەدار و پێشمەرگە لە ڕێگەی پڕۆژەی هەژماری من هاوکاری هاوپەیمانان وەردەگرن، ئەوانەی تریش لە ڕێگەی سیستەمی بانکیەوە وەردەگرن.

 

ئەوەی پێویستە بیزانیت: هاوکاریی هاوپەیمانان بڕەکەی 20 ملیۆن دۆلارە، بەڵام هەمووی دابەش ناکرێت و بەشێکی بۆ پێداویستییە لۆجسیتییەکانی هێزەکانی پێشمەرگە خەرج دەکرێت.