عێراق؛ هۆشداری لە زیادبوونی ڕێژەی خۆڵبارین دەدرێت

ئاڤا نیوز

ڕێکخراوێکی کاروباری ژینگە، هۆشداریی لە زیادبوونی شەپۆلەکانی خۆڵبارین لە عێراق دەدات و دەڵێت "مەترسیی بەردەوامیی خۆڵبارین و وشکەساڵی لە وەرزی زستانیشدا هەیە."

زانیاریی بەدەستهاتوو: بەپێی ڕاپۆرتێکی ڕوانگەی عێراقی سەوز، ئەو بارانەی لە ماوەی ڕابردوودا باریوە نەبووەتە هۆی زیادبوونی ڕێژەی ئاوی ڕووبارەکان و ئاوی ژێر زەوی، ئەمەش وای کردووە ڕووبەرێکی فراوانی پارێزگاکانی ناوەڕاست و باشووری عێراق بە وشکی بمێنێتەوە و ببێتە سەرچاوەی دروستبوونی خۆڵبارین؛ لە کاتێکدا دەبوو لە زستاندا، ئەم دیاردەیە کەم ببێتەوە.

هەر بەگوێرەی ڕوانگەکە، ئەو شەپۆلە خۆڵبارینەی دوێنێ بەغدا و چەند پارێزگایەکی گرتەوە، ئاماژەیە بۆ چربوونی ڕێژەکەی لە بەهار و هاوینی داهاتوودا. هەروەها ڕەخنەی تووندی لە لایەنە پەیوەندیدارەکان، بەتایبەت وەزارەتەکانی ژینگە، کشتوکاڵ و سەرچاوە ئاوییەکان گرتووە، چونکە تا ئێستا هیچ چارەسەرێکی کردەیی بۆ ئەم پرسە نەکردووە.

لەلایەکی دیکەوە: لە ڕووی تەندروستییەوە، ڕوانگەی عێراقی سەوز هۆشداریی داوە لەوەی بەردەوامی خۆڵبارین دەبێتە هۆی تووشبوون بە نەخۆشییەکانی وەک شێرپەنجە، چاو و  حاڵەتەکانی تەنگەنەفەسی.