لە بەغدا 53 کەس بەهۆی خواردنەوەی ئاوی پیس تووشی پەککەوتنی گورچیلە دەبن

 

 

ژمارەیەکی زۆری دانیشتووانی ناوچە پیشەسازییەکان لە بەغدا، بە هۆی پیسبوونی ئاوی خواردنەوە، تووشی نەخۆشییەکانی گورچیلە بوونەتەوە، ئەنجوومەنی پارێزگای بەغدا لە ڕێگەی لیژنەیەکەوە هۆکارەکانی ئاشکرا دەکات. 

 

چیرۆکی سەرەکی: پیسبوونی ئاوی خواردنەوە ساڵانێکی زۆرە یەخەی شارەکانی عێراقی گرتووە، سەرەڕای هەبوونی چەندین پرۆژەی دابینکردنی ئاوی خواردنەوەی ماڵان، بەڵام نەتوانراوە دانیشتووانی ناوچە پیشەسازییەکان لە تووشبوون بە نەخۆشییەکانی گورچیلە بپارێزێت. ئەنجوومەنی پارێزگای بەغدا داوای ڕێگا چارەیەکی بەپەلە دەکات.

 

 

لێدوانی فەرمی: عەلی خەلیل ئەلعامری، ئەندامی ئەنجوومەنی پارێزگای بەغدا، ڕایگەیاند، لە بەدواداچوونەکاندا، ئەنجوومەنی پارێزگا بۆی دەرکەوتووە کە تووشبوون بە حاڵەتی پەککەوتنی گورچیلە لە نێو دانیشتووانی ناوچە پیشەسازییەکان لە کەرتی ڕەسافەی بەغدا، بە ڕێژەیەکی زۆر زیادی کردووە؛ ئەنجوومەنەکە ئاماژەی بەوەشکردووە، 53 کەیس تۆمارکراوە و تاوەکو ئێستا نەتوانراوە چارەسەری گونجاویان بۆ بکرێت. 

 

 

عەلی خەلیل ئەلعامری، دەڵێت: "لێکۆڵینەوەکان دەریانخستووە چەند کارگەیەکی کەرتی تایبەت، بەبێ ڕەچاوکردنی ڕێنماییە ژینگەییەکان و دوور لە چاودێری حکومەت، بوونەتە هۆی پیسبوونی ئاوی ماڵان لەو ناوچانەدا."

 

٠ بەهۆی هەژارییەوە، خەڵک لەبری پزیشک پەنا دەبەنە بەر دەرمانی بێ ڕەچەتە و نۆڕینگە بێ مۆڵەتەکان، ئەمەش مەترسیی سەر ژیانیانی زیاتر کردووە.

 

 

زانیاریی زیاتر: ئەنجوومەنی پارێزگای بەغدا، داوای بڕیارێکی بەپەلە دەکات بۆ باشترکردنی خزمەتگوزارییە تەندروستییەکان و ڕێگریکردن لەو سەرچاوانەی ئاوی شارەکە پیس دەکەن، تاوەکو ڕێگری لە کارەساتی مرۆیی گەورەتر بگیرێت.