بە پرۆگرامێکی تایبەت چارەسەرکاریی بۆ ئالوودەبووانی ماددەی هۆشبەر دەکرێت

ئاڤا نیوز

لە سەنتەری شیاندنەوەی ئالوودەبووانی ماددەی هۆشبەر لە بەڕێوەبەرایەتیی چاکسازیی ژنان و منداڵانی هەولێر، بە پرۆگرامێکی تایبەت چارەسەر بۆ ئالوودەبووان دەکرێت.

چیرۆکی سەرەکی: ئەمڕۆ پێنجشەممە 15-1-2026، خولێکی چارەسەر بۆ ئالوودەبووان کۆتایی هات کە تیایدا نۆ ژنی ئالودەبووی ماددەی هۆشبەر ڕاهێنان و چارەسەرییان بۆ کراو و بڕوانامەی بەشداربوونیان پێشکەش کرا.

لێدوانی فەرمی: تەیب عەبدولعەزیز، بەڕێوەبەری چاکسازیی ژنان و منداڵانی هەولێر بە ئاڤای گوت: "لە سەنتەری شیاندنەوەی ئالودەبووانی ماددەی هۆشبەر لە بەڕێوەبەرایەتییەکەمان، لە دوو خولی چارەسەرکاری، بە پرۆگرامێکی تایبەت ڕاهێنان و چارەسەریمان بۆ 18 ژنی ئالودەبووی ماددەی هۆشبەر کردووە، ئەمڕۆش قۆناغێکی دیکە دەستی پێکرد و هەشت ئالودەبووی دیکە خرانەبەر پرۆگرامی چارەسەرکاری."

بەڕێوەبەری چاکسازیی ژنان و منداڵانی هەولێر وتیشی: "بەگوێرەی پڕۆگرامی ماتریکس (Matrix) ئالوودەبووان بۆ ماوەی سێ مانگ ڕاهێنان و پڕۆگرامی چارەسەرییان لەلایەن تۆیژەرانی دەروونی پێدەدرێت."

٠ ئامانج لەم ڕاهێنان و چارەسەرییانە بۆ ئەوەیە تا ئالوودەبووان ماوەی سزایان تەواو دەبێت تەواو چارەسەریان بۆ بکرێت و بە تەواوەتی لە ماددەی هۆشبەر دووربکەونەوە.

زانیاریی زیاتر: ئەم پڕۆگرامە لە ویلایەتە یەکگرتووەکانی ئەمریکا بۆ چارەسەری ئالوودەبووانی ماددەی هۆشبەر باوەڕپێکراوە. 

باکگراوند: ڕۆژی 12-6-2024، سەنتەری شیاندنەوەی ئالوودەبووانی ماددەی هۆشبەر، لە بەڕێوەبەرایەتی چاکسازی ژنان و منداڵانی هەولێر کرایەوە، ئامانج لە کردنەوەی ئەم سەنتەرە ئەوەیە، هەموو ئەو کەسانەی بە مادەی هۆشبەر سزدراون لەڕێگەی پزیشکانی دەروونی، توێژەرانی کۆمەڵایەتی و توێژەرانی دەروونی چارەسەری و ڕاهێنانی دووبارە شیاندنەوەیان بۆ بکرێت.