دوای بەدواداچوونی ئاڤا؛ مۆڵەتی كۆگاكانی دەرمان بە مەرجی بەرگریی شارستانی دەبەسترێتەوە

ئاڤا نیوز

لەمەودوا لە هەولێر مۆڵەتی ساڵانەی كۆگاكانی هەڵگرتنی دەرمان نوێ ناكرێتەوە و مۆڵەت بە هیچ كۆگایەكی نوێ نادرێت، تاوەکو ڕەزامەندی و پشتگیریی بەرگریی شارستانی بۆ مەرجەکانی سەلامەتی بەدەستنەهێنن.

وێنە گەورەکە: سووتانی سێ كۆگای سەرەكیی دەرمان لە هەولێر لە ساڵی ڕابردوودا، كە مەرجەكانی سەلامەتییان تێدا نەبوو، بووە هۆی بڕیارێک بۆ پاراستنی ئاسایشی دەرمان و ڕێگرییە لە دووبارەبوونەوەی ئەو کارەساتانەی زیانی گەورەی دارایی و تەندروستییان لێدەکەوێتەوە.چی

چیرۆکی سەرەکی: لە 19-11-2025 لە بەرنامەی "مۆری ئاڤا" دۆسیەی سووتانی سێ کۆگای دەرمان ورووژێنرا؛ لەوێدا وتەبێژی بەرگریی شارستانی پێشنیاری کرد مۆڵەتەکان بە مەرجی ئەوان ببەسترێنەوە، دوای زیاتر لە زیاتر لە مانگێک لایەنە پەیوەندیدارەکان (بەرگریی شارستانی و چاودێریی دەرمان) گەیشتوونەتە ڕێککەوتن و بڕیارەکە چووەتە بواری جێبەجێکردنەوە، بڕیارەکە بەمشێوەیە هیچ کۆگایەک ناتوانێت بەبێ هەبوونی سیستەمی ئاگرکوژێنەوە و مەرجەکانی سەلامەتی، مۆڵەتەکەی بۆ ساڵی 2026 نوێ بکاتەوە.

لێدوانی فەرمی: موقەدەم شاخەوان سەعید، وتەبێژی بەرگریی شارستانیی هەولێر لە بەرنامەی مۆری ئاڤا ڕایگەیاند: دوای ئەوەی لە ڕێگەی ئاڤاوە داوامان لە بەشی چاودێریی دەرمان کرد مۆڵەتەکان نوێ نەکەنەوە تاوەکو مەرجەکانی سەلامەتی جێبەجێ نەکرێن، ئێستا ئەو هەماهەنگییە هەیە و بڕیارەکە جێبەجێ دەکرێت. داوا لە هەموو لایەنەکان دەکەین لەپێناو سەلامەتیی گشتی، پێدانی مۆڵەت لە هەموو شوێنەکان پەیوەست بکەن بە ڕەزامەندیی بەرگریی شارستانی.

ئەوەی پێویستە بیزانیت: پێشتر کۆگاکانی دەرمان بەهۆی نەبوونی چاودێریی وردی بەرگریی شارستانی لە کاتی نوێکردنەوەی مۆڵەتدا، ڕووبەڕووی مەترسیی ئاگرکەوتنەوە دەبوونەوە.