ئاڤای خەڵک؛ گەوەڕەکانی ئاژەڵ دانیشتوونی ئەڵڵایی بازیان بێزار دەکەن

ئاڤا نیوز

دانیشتووانی گوندی "ئەڵڵایی" لە سنووری قەزای بازیان بەدەست بوونی گەوەڕ و شوێنی بەخێوکردنی ئاژەڵ لەناو ماڵەکانیاندا دەناڵێنن و داوای گواستنەوەیان دەکەن، قایمقامی ناوچەکەش ڕایدەگەیەنێت ڕێکاری یاسایی بەرامبەر سەرپێچیکاران دەگرنەبەر.

چیرۆکی سەرەکی: خەڵکی گوندی ئەڵڵایی ئاماژە بەوە دەکەن  ژیانیان بەهۆی بۆنی ناخۆش و پیسی ئەو شوێنانەی بۆ بەخێوکردنی ئاژەڵ لەناو گوندەکە و لەناو ماڵەکاندا دروستکراون، تێکچووە. دەڵێن چەندینجار داوایان کردووە ئەم شوێنانە بۆ دەرەوەی ناوچەی نیشتەجێبوون بگوازرێنەوە، چونکە ژینگەی گوندەکەیان پیس بووە و بەو هۆیەوە بێزار بوون. سەرەڕای سکاڵا بەردەوامەکانیان، هێشتا کێشەکە لە هەندێک شوێندا ماوەتەوە و داواکارن لایەنە پەیوەندیدارەکان بە هانایانەوە بچن.

لێدوانی فەرمی: ئیسماعیل ئەحمەد، قایمقامی بازیان بە ئاڤای ڕاگەیاند: "چەند جارێک سکاڵامان بەدەست گەیشتووە بۆ ئەم کێشەیە و چەند جارێکیش گەوەڕەکان تێکدراون و لێپێچینەوە لەگەڵ کەسانی سەرپێچیکار کراوە." وتیشی: "ئێستا ئەگەر گەوەڕی دیکە دروست کرابن با خەڵک ئاگادارمان بکەنەوە، بەدواداچوونی بۆ دەکەین."