بەڕێوەبەری بەنداوەکان: ئەمساڵ بەڕێژەی 200٪ ئاستی ئاو زیادی کردووە

ئاڤا نیوز

ئەمساڵ بەراورد بە ساڵی ڕابردوو ڕێژەی بارانبارین لە هەرێمی کوردستان زیادی کردووە، بەڕێوەبەری بەنداوەکانی هەرێمی کورستان باس لەوە دەکات داهاتی ئاو لە هەندێک شوێن 200٪ زیادی کردووە و ژمارەیەک بەنداو سەرڕێژبوون.

لێدوانی فەرمی: ڕەحمان خانی، بەڕێوەبەری بەنداوەکانی هەرێمی کوردستان، بە ئاڤا میدیای وت: بەنداوەکانی سنووری گەرمیان، سلێمانی، کۆیە و بەنداوی خەنس لە دهۆک سەرڕێژ بوون.

بەڕێوەبەری بەنداوەکان ئەمانەشی وتشی: "دوای ڕووخانی ڕژێم و سەرەتای حکومەتی نوێی عێراق دوو بەنداو لەسەر خەرجی حکومەتی عێراق دروست کران، بەڵام سەرجەم بەنداوەکانی دیکە لەسەر بودجەی هەرێمی کوردستان دروست کراون."

٠ بۆ چوار بەنداوی ستراتیژیی لەگەڵ بەغدا لە گفتوگۆداین و هەنگاوی باشمان ناوە. 

٠ ئەمساڵ بە بەراورد بە ساڵی ڕابردوو ڕێژەی بارانبارین زۆر بووە، داهاتی ئاو لە هەندێک شوێن 100٪ و لە هەندێک شوێنی دیکە 200٪ زیادی کردووە.

کاریگەرییەکان: بە گوتەی بەڕێوەبەری بەنداوەکانی هەرێمی کوردستان، بەنداوەکان کاریگەریی ئەرێنی لەسەر بوژاندنەوەی کەرتی کشتوکاڵ دەبێت. 

زانیاریی زیاتر: ڕەحمان خانی دەڵێت: "لە دەشتی کۆیە بەنداوێکمان هەیە کە توانای گلدانەوەی سێ ملیۆن مەتر سێجا ئاوی هەیە، بەهۆی گرفتی وەزارەتی کارەبا و شارەوانی ناتوانین ئاو کۆبکەینەوە، تەنیا یەک ملیار دینارمان پێویستە و پارەمان بۆ خەرج ناکرێت."

ئەمەش بزانە: لە هەرێمی کوردستان 22 بەنداوی بچووک و سێ بەنداوی گەورە هەیە.