گرووپە چەکدارەکانی عێراق بەشدارییان لە هێرشەکەی ئێران بۆ سەر ئیسرائیل نەکردووە

ئاڤا نیوز

گرووپە چەکدارەکانی عێراق هەرچەندە بەشدارییان لە هێرشەکەی ئێران بۆ سەر ئیسرائیل نەکردووە، بەڵام ترسیان هەیە بارەگا و بەرپرسەکانیان لەلایەن ئیسرائیلەوە بکرێنە ئامانج. 

 

زانیاریی بەدەستهاتوو: بەگوتەی سەرچاوەیەکی ئەمنی عێراقی، گرووپە چەکدارەکانی نزیکی ئێران لە عێراق بەشدارییان لە هێرشەکەی ئێران بۆ سەر ئیسرائیل نەکردووە، لە عێراقیشەوە هیچ بۆردوومانێک نەکراوە، بەڵکو تەنیا بە ئاسمانی وڵاتەکەدا درۆن و مووشەکەکان تێپەڕیون.

 

مەترسییە پێشبینیکراوەکان: گرووپە چەکدارەکان ترسیان هەیە بارەگا و بەرپرسەکانیان لەلایەن ئیسرائیلەوە بکرێنە ئامانج، لەگەڵ هێرشەکەی ئێران بۆ سەر ئیسرائیل زۆرینەی بارەگا سەرەکییەکانیان چۆڵکرد تەنیا چەند پاسەوانێکی کەم ماونەتەوە.

 

لەلایەکی دیکەوە: کۆبوونەوەی فەرماندە و بەرپرسی گرووپە چەکدارەکانیش ڕاگیران، ئەم ڕێوشوێنانەش بەردەوام دەبن تاوەکو مەترسییەکانیان دەڕەوێنەوە.

 

ئەوەی پێویستە بیزانیت: گرووپە چەکدارەکان نیازیشیان نییە هێرشەکانیان بۆ سەر ئامانجە ئیسرائیلییەکان ڕابگرن.