تورکیا: هێرشەکەی ئیسرائیل بۆسەر كۆنسوڵخانەی ئێران لە دیمەشق نایاسایی بوو

ئاڤا نیوز

وەزیری دەرەوەی تورکیا لەگەڵ هاوتا ئێرانییەکەی لە رێگەی پەیوەندیی تەلەفونییەوە تاوتوێی دوایین گۆڕانکارییەکانی ناوچەکەیان کردووە. توركیا هێرشەكەی ئیسرائیلی بۆ سەر كۆنسوڵخانەی ئێران لە دیمەشق بە نایاسایی ناوبردووە.

ڕاگەیێنراوی فەرمی: دوای ڕووداوەکەی شاری ئەسفەهان، هاکان فیدان، وەزیری دەرەوەی تورکیا لەگەڵ حوسێن ئەمیر عەبدوڵڵاهیانی هاوتای، بە تەلەفۆن قسەی کردووە و تاوتوێی گۆڕانکارییە چاوەڕوانکراوەکانی ناوچەکەیان کردووە.

زانیاریی زیاتر: بە پێی ڕاپۆرتێکی ئاژانسی ئەنادۆڵ، پەیوەندییە تەلەفونییەکە لەسەر داوای ئێران بووە و داوایان لە تورکیا کردووە ڕۆڵێکی گرنگ ببینێت لە ‌هێور کردنەوەی دۆخی ناوچەکە.

لێدوانی فەرمی: هاکان فیدان، وەزیری دەرەوەی توركیا ڕایگەیاند: ''هۆکاری هەڵگیرساندنی گرژییەکان لە ناوچەکە، هێرشی نایاسایی ئیسرائیل بوو بۆسەر كۆنسوڵخانەی  ئێران لە دیمەشق''.

لە لایەکی دیکەوە: تورکیا داوای لە وڵاتانی ناوچەکە کردووە بە ژیرانە بیر لە هەنگاوی داهاتوو بکەنەوە، بۆ ئەوەی دۆخەکە پەرە نەسێنێت و گرژییەکان زیاتر نەبن.