ئێران: هێرشەکەی ئیسرائیل لە یاریی منداڵان دەچوو

ئاڤا نیوز  

وەزیری دەرەوەی ئێران هێرشەکەی ئیسرائیل بۆسەر ناوەندەکانیان لە ئەسفەهان بە یاریی منداڵان دەچووێنێت، ئاماژە بەوەش دەدات ئێران پلانی وەڵامدانەوەی نییە.

چیرۆکی سەرەکی: بەرەبەیانی هەینی 19-4-2024، دەنگی چەند تەقینەوەیەکی گەورە لە ئەسفەهان بیسترا، دوای ئەویش میدیا ئەمریکییەکان باسیان لەوە کرد، بەرپرسانی ئێران و ئیسرائیل ئاگادار کراونەتەوە کە ئیسرائیل هێرشی مووشەکی کردووەتە سەر چەند بنکە و ناوەندێکی ئاسمانیی نزیک ئەسفەهانی ئێران.

لێدوانی فەرمی: "ئەوەی ڕوویدا گورزێک نەبوو، بەڵکو زیاتر لەو یارییانە دەچوو کە منداڵەکانمان یاری پێدەکەن نەک فڕۆکەی بێفڕۆکەوان". حوسێن ئەمیر عەبدوڵڵاهیان وەزیری دەرەوەی ئێران لە میانی چاوپێکەوتنێکی لەگەڵ کەناڵی NBC نیوز ئەمەی گوت.

زانیاریی زیاتر: عەبدوڵڵاهیان ئاماژەی بەوەشکرد، "ئێران پلانی وەڵامدانەوەی نییە تا ئیسرائیل هێرشێکی گەورە ئەنجام نەدات".

ئەمەش بزانە: ئەسفەهان دوو ناوەندی گرنگ و سەرەکیی ئەتۆمیی ئێرانی لێیە، کە ناوەندی پیتاندنی نەتەنز و ناوەندی تەکنەلۆژیای یۆرانیۆمی ئەسفەهان (UCF)ـن، بوونی ئەم دوو ناوەندە ئەتۆمییە گرنگییەکی گەورەیان بۆ بنکەی هەشتەمی ئێران هەیە.