ئەمریکا: حکومەتی هەرێمی کوردستان لە  پاراستنی خەڵکی سڤیل و یەکسانیی جێندەری هەنگاوی گەورەی ناوە

ئاڤا نیوز
 
وەزارەتی دەرەوەی ئەمریکا ڕاپۆرتی ساڵانەی خۆی لەسەر مافەکانی مرۆڤ بڵاو  کردەوە کە تیایدا ئاماژە بە پێشيلکارییەکانی گرووپ و میلیشیا لەیاسادەرچووەکانی عێراق، تووندوتیژیی تائیفی، هێرشە تیرۆریستییەکانی داعش و ئۆپەراسیۆنە سەربازییەکانی سوپای تورکیا بۆ سەر پارتی کرێکارانی کوردستان کراوە.

 
ئەو مانایەی دەیگەیێنێت: لە ڕاپۆرتەکەدا بەستنەوەی هەرێمی کوردستان بە پارێزگاکانی دیکەی عێراق، هۆکارە بۆ ئەوەی وەزارەتی دەرەوەی ئەمریکا بڵێت "دۆخی مافی مرۆڤی باش نییە"، لە کاتێکدا زۆربەی پێشێلکارییەکان پەیوەندییان بە میلیشیا شیعییەکان و ئەو گرتن و بێسەروشوێنکردن و تیرۆرانەوە هەیە کە لە شارەکانی نێوەڕاست و باشووری عێراق بەرامبەر بە ڕۆژنامەنووسان و چالاکانی مەدەنی و خەڵکی سڤیل کراوە. 

 

زیانە سەرەکییەکان: وەزارەتی دەرەوەی ئەمریکا بکەری سەرەکی ئەم پێشێلکارییانەشی بۆ "میلیشیا شیعییەکانی نزیک لە ئێران و ژێر هەژموونی حکومەت و دەسەڵاتدارانی عێراق" گەڕاندووەتەوە کە ڕێگرن لە ئازادیی ڕادەربڕین و خۆپێشاندان و ناڕەزایەتی" و عێراقیان کردووەتە زیندانێکی گەورە بۆ نەیار و خەڵکی بێتاوان".

 

زانیاریی زیاتر: بەمەش دۆخی زیندانەکانی هوت لە زیقار و زیندانی رەسافە و حیلە، بە خراپ وەسف کراوە کە قەرەباڵخییەکەیان 400%ـە لە کاتێکدا قەرەباڵخی ئەو چەند زیندانەی لە هەموو هەرێمی کوردستان هەن "157%ـە و تەنیا  چوار هەزار و 922 زیندانییان تێدایە کە 181 کەسیان نەوجەوانن و لە چاکسازییەکانن".

 

ژمارەکان وادەڵێن: وەزارەتی دەرەوەی ئەمریکا، پشت بە ئامارەکانی ئەمنیستی ئینتەرناشناڵ و ڕێکخراوەکانیی ڕوانگە و خاچی سووری عێراقی بۆ مافەکانی مرۆڤ دەبەستێت کە "لە ساڵی 2017 بۆ 2023، نزیکەی 12 هەزار خێزانی عێراقی ئەندامێکیان بێسەروشێن کراوە" و "لە شەش مانگی یەکەمی ساڵی ڕابردووش 994 داواکاری بۆ ڕوونبوونەوەی چارەنووسی کەسانی ونبوو کراوە" و "چارەنووسی 643 کەس لە ئۆپەراسیۆنی کۆنترۆڵکردنەوەی فەلوجە نادیارە کە چەکدارانی حەشدی شەعبی بێسەروشوێنیان کردوون".

 

مەترسییە پێشبینراوەکان: چەند پێشێلکارییەکی دیکە لە ڕاپۆرتەکەی وەزارەتی دەرەوەی ئەمریکا ئاماژەی پێدراوە وەک "گەڕاندنەوەی زۆرەملێی ئاوارەکانی ناوخۆی عێراق بۆ زێدی خۆیان لەکاتێکدا ‌هێشتا مەترسی و ‌هەڕەشە لەسەر ژیان و ئازادییان هەیە" و "پرسی جێندەری و لەشفرۆش و هاوڕەگەزخوازەکان" کە لە عێراق هەڕەشەیان لەسەرە.

 

کاریگەریی ئەرێنی: وەزارەتی دەرەوەی ئەمریکا لە ڕاپۆرتەکەی لەسەر دۆخی مافی مرۆڤ، ئەوەشی نەشاردووەتەوە بە پلەی یەکەم حکومەتی هەرێمی کوردستان و دواتریش حکومەتی فیدراڵیی عێراق، هەوڵی ڕووبەڕووبوونەوەی ئەو پێشێلکاریانەیان داوە وەک "لێکۆڵینەوە، دادگایی تۆمەتبارانی تیرۆر و داعش و سزادانی بەرپرسی تۆمەتبار بە پێشێلکردنی مافەکانی مرۆڤ" و "ڕاهێنانی 400 پێشمەرگە و کارمەند لە هێزە ئەمنییەکانی هەرێمی کوردستان هەنگاوی گەورەن لە پاراستنی مافەکانی مرۆڤ و یەکسانیی جێندەری و گیانی خەڵکی سڤیل".

 

پێدراوە ڕاستەکان:  سەبارەت بە هەرێمی کوردستان، وەزارەتی دەرەوەی ئەمریکا باسی کوژرانی 3 بەرپرس و ئەشکەنجەدانی ژنە ڕۆژنامەنووسێک دەکات کە ئەوانیش بریتیین لە:

 

·  محەممەد میرزا کە پەکەکە لە زاخۆ ئۆتۆمبێلەکەی تەقاندەوە. 

·   هەوڵدان بۆ تیرۆرکردنی کاروان گەزنەیی ـ پەرلەمانتاری پێشووی یەکێتی لە کۆیە 

·  کوشتنی دوو ئەندامی حیزبی دیموکراتی کوردستانی ئێران لە هەڵشۆ

·   ئەشکەنجەدانی نازیلا مەعروفیان بۆ ماوەی 13ڕۆژ لە زیندانەکانی سلێمانی