تورکیا دەستوورێکی نوێ دەنووسێتەوە

ئاڤا نیوز 

پرسی "نووسینەوەی دەستووری نوێ" بابەتی  گەرمی ڕۆژەڤی تورکیایە و هەموو پارتە سایسییەکانی ئەو وڵاتەی هێناوەتە دەنگ.

وێنە گەورەکە: لە دوای یادی سەد ساڵەی دامەزراندنی تورکیا، لایەنەكانی تورکیا بە تایبەت ئاکپارتی ، بوونی دەستوورێکی نوێ بۆ وڵات بە پێویست دەزانن.

لێدوانە فەرمییەکان: ڕەجەب تەیب ئەردۆغان هەفتەی ڕابردوو ڕایگەیاندبوو، پێویستە تورکیا "دەستوورێکی داهێنەرانە و ئازادیخوانەی" هەبێت.

لە لایەكی دیكەوە: تولای هاتیمۆغوڵڵاری، هاوسەرۆکی دەم پارتی گوتی: تورکیا پێویستی بە دەستوورێكی نوێ هەیە، بەڵام رێگە نادەن گفتوگۆکان لەبارەی دەستوور ببنە فریادڕەسی دەسەڵات.
یەڵما تونج، وەزیری دادی تورکیا گوتی: ئامانجمان دەستورێکی دیموکراسی، مەدەنییە بە بەشداری هەموو لایەک.

ئەوەی پێویستە بیزانیت: نوعمان کورتوڵموش، سەرۆکی پەرلەمانی تورکیا بۆ گفتوگۆکردن لەبارەی گۆڕینی دەستوور و پەیڕەوی ناوخۆ ئەم هەفتەیە سەردانی فراکسیۆنەکانی پەرلەمان دەکات. یەکەم کۆبوونەوەشی لەگەڵ فراکسیۆنی پارتی گەلی کۆماری جەهەپە دەبێت.

چاوەڕوانکراوەکان: بڕیار وایە رۆژی پێنج شەممە، ڕەجەب تەیب ئەردۆغانی سەرۆکی ئاکپارتی لەگەڵ ئۆزگور ئۆزەلی سەرۆکی جەهەپە کۆببێتەوە،  تەوەری سەرەکی دانانی "دەستورێکی نوێ "دەبێت.

ئەمەش بزانە: ئەمڕۆ ئەردۆغان سەردانی دەوڵەت باخچەلی سەرۆکی پارتی (مەهەپە)ی کرد. لەسەر هەمان پرس گفتووگۆ کراوە.