بەمزووانە هەناردەی نەوتی هەرێمی کوردستان دەستپێدەکاتەوە

ئاڤا نیوز

 

ڕاگرتنی هەناردەی نەوتی هەرێمی کوردستان، زیانێکی زۆری بە ئابووریی عێراق گەیاندووە و ڕاوێژکارێکی سوودانیش ڕایدەگەیێنێت، لە نزیکترین کاتدا هەناردەکردنی نەوت لە ڕێگەی بەندەری جەیهان دەستپێدەکاتەوە.

بۆچی گرنگە: دەستپێکردنەوەی هەناردەکردنی نەوتی هەرێمی کوردستان، کاریگەریی ئەرێنی لەسەر بووژانەوەی ئابووریی هەرێمی کوردستان دەبێت، چونکە نەوت سەرچاوەی سەرەکی داهتەکەیەتی، هەروەها کاریگەری لەسەر بووژانەوەی ئابووریی عێراقیش دەبێت.

لێدوانی فەرمی: سەبهان مەلا جیاد، ڕاوێژکاری سوودانی بە ئاڤا نیوزی گوت: "هاوپەیمانیەتییەک لە نێوان هەولێر و بەغدا پێکهێنراوە بۆ چارەسەری کێشەکانی پەیوەست بە هەناردەکردنەوەی نەوت، هەردوولا لە ڕێککەوتن نزیکن و بەمزووانە دەستپێدەکاتەوە".

لە لایەکی دیکەوە: مایڵز کاگینز، گوتەبێژی ئەپیکور بە ئاڤا نیوزی گوت: "لەم ماوەیەدا کۆبوونەوەیەک لەسەر ئەو پرسە کراوە، چاوەڕێی کۆبوونەوەی ئایندەین تاوەکو کاتی دەستپێکردنەوەی هەناردەکردنەوەی نەوت دیاری بکرێت".

ئەوەی لەبارەیەوە دەگوترێت: عێراق هیچ ڕێککەوتنێکی لەگەڵ تورکیا بۆ ئاڵوگۆڕی "ئاو بەرامبەر بە دەستپێکردنەوەی هەناردەی نەوت" نەکردووە، پرسی نەوتیش لەنێو ئەو 26 یادداشتەدا نەبووە کە لەنێوان هەردوو وڵات واژۆ کران.

گۆشەیەکی دیکەی دیمەنەکە: تورکیا خواستی هەناردەی نەوتی هەرێمی کوردستانی هەیە و چەند جارێکیش ڕایگەیاندووە کە پاڵاوگەکان لە ڕووی تەکنیکییەوە ئامادەن.

 

ئەوەی پێویستە بیزانیت: سەرۆکوەزیران بارزانی ڕایگەیاندووە، پێویستە هەناردەی نەوت دەستپێبکاتەوە.

کاریگەری و لێکەوتەکان: ڕاگرتنی هەناردەکردنی نەوتی هەرێمی کوردستان لە ڕێگەی بەندەری جەیهانی تورکیا 10 تاوەکو 12 ملیار دۆلار زیانی بە بوودجەی عێراق گەیاندووە.

باکگراوند: ڕۆژی 25ـی ئاداری 2023 بە بڕیاری دادگەی ناوبژیوانیی پاریس، هەناردەی نەوتی هەرێمی کوردستان ڕاگیرا.