بەردانەوەی ئاوی خواردنەوەی زۆرینەی دانیشتووانی کەرکووک وەستاوە

ئاڤا نیوز

جێگری بەڕێوبەری ئاوی کەرکووک ڕایگەیاند، بەهۆی ڕاگرتنی پێدانی کارەبا و لێڵبوونی ئاوەوە، بەردانەوەی ئاو بۆ هاووڵاتیان  وەستاوە.

چیرۆکی سەرەکی: لە ماوەی 48 کاتژمێری ڕابردوو دا ئاوی خواردنەوەی که‌رکووک لێڵ بووە و پێدانی کارەبا بە پڕۆژەی ئاوی شارەکە وەستاوە، بەمەیش بۆ پاراستنی ئامێرەکان، بەردانەوەی ئاوی 90%ـی دانیشتووانی قەزای ناوەندیی کەرکووک وەستاوە و مەترسی بێئاوییان لەسەرە.

لێدوانی فەرمی: جیهان ئیبراهیم، جێگری بەڕێوەبەری ئاوی کەرکووک بە ئاڤا نیوزی گوت: لەترسی ئەوەی فلتەرەکانی پاڵاوتن بەهۆی لێڵی ئاوەکە لەکار نەکەون تۆڕباینەکانیان وەستاندووە.

زانیاریی زیاتر: ئەگەر پێدانی کارەبا بۆ پڕۆژەکە ئاسایی ببێتەوە، سبەی بەردانەوەی ئاو دەستپێدەکاتەوە. 

وێنە گەورەکە: شەپۆلێکی باران بارین چەند ڕۆژێکە عێراق و هەرێمی کوردستانی گرتووەتەوە، لە چەند ناوچەیەک زیانی گیانی و ماددی هەبووە.