دەیان خێزانی ئاوارەی کەمپێکی سلێمانی دوای گەڕانەوەیان لە خێمەدا دەمێنەوە

ئاڤا نیوز 

 

دەیان خێزانی عێراقی کە لە کەمپێکی سنووری سلێمانیدا بوون، دوای گەڕاندنەوەیان بێ شوێن و ماڵ ماونەتەوە و لە خێمەدا دەمێننەوە.

 

وێنە گەورەکە: عێراق بڕیاری داوە تاوەکو 30 تەمموزی ئەمساڵ، سەرجەم کەمپەکان دابخات و بەشێکی زۆریش لە ئاوارەکانی هەرێمی کوردستان دژ بەو هەنگاوە وەستاونەتەوە و نایانەوێت بگەڕێنەوە.

 

ڕاگەیێنراوی فەرمی: ناوەندی عێراقی بۆ بەڵگەنامەکردنی تاوانەکانی جەنگ دەڵێت، بەشێک لەو خێزانانەی کە لەسەر بڕیاری حکومەتی عێراق لە "کەمپی ئاشتیی سلێمانی" گەڕانەوە بۆ ناوچەکانیان لە پارێزگای سەڵاحەددین، میلیشیاکان لە ناوچەی عەجێلیە ڕێگرییان لێکردوون و ڕێگە نادەن بگەڕێنەوە ناوچەکانیان.

 

زانیاریی زیاتر: بەهۆی نەبوونی ماڵ و ڕێگرییەکەوە خێزانەکان خێمەیان هەڵداوە، لەوەشدا هێزێکی سوپا ڕێگری لێکردوون، بە پاساوی ئەوەی بەبێ مۆڵەت ناتوانن کەمپی مانەوە دروست بکەن.

 

ئەوەی ئێستا ڕوودەدات: ئاوارەکان خەڵکی یەسریب و دوجەیلن، بە نزیکەی 120 خێزان مەزەندە دەکرێن و ئێستا لەسەر ڕێگەی نێوان شەهابی و عجێلیە بڵاوبوونەتەوە و پێویستیان بە خۆراک و پێداویستییە مرۆییەکان هەیە بەتایبەتی ئافرەتان و منداڵان.

 

گۆشەیەکی دیکەی دیمەنەکە: ڕۆژنامەی ئەلعەرەبییە جەدید باسی لەوە کردووە: ئەو 120 خێزانانە نەیانتوانی بگەنە ناوچەکانیان، چونکە لەژێر کۆنترۆڵی گرووپە چەکدارەکانە، لە دۆخێکی خراپ و بێ هیچ پشتگیرییەکدا.

 

ئەمەش بزانە:  لەبارەی پرسەی گەڕاندنەوەش ئاوارەیەک بە ڕۆژنامەکەی گوتووە: چووڵکردنی کەمپەکان ئارەزوومەندانە نەبووە و حکومەتی عێراق بە هەڕەشە و فێڵکردن ناچاری کردوون بەبێ هەماهەنگی بگەڕێنەوە.

 

لەلایەکی دیکەوە: دیندار زێباری، ڕێکخەری ڕاسپاردە نێودەوڵەتییەکانی حکومەتی هەرێمی کوردستان بە ئاڤا نیوزی گوت، "ئێمە پابەندین بە پڕەنسیپە نێودەوڵەتییەکان لەسەر بنەمای ئارەزوومەندانەی گەڕانەوەی ئاوارە و پەنابەران بۆ ناوچەکانیان، حکومەتی هەرێمی کوردستان لەگەڵ داخستنی زۆرەملێی هیچ کەمپێکدا نییە و  پێویستە عێراقیش پابەندی بڕیارە نێودەوڵەتییەکان بێت.