بەڕێوەبەری TBI بۆ ئاڤا نیوز: هەژماری من بۆ مووچەخۆرانی هەرێمی کوردستان دەکەینەوە

ئاڤا نیوز 

 

بەڕێوەبەری گشتیی بانکی بازرگانیی عێراق ئاماژە بەوە دەدات، کێشەیان لەگەڵ پرۆژەی هەژماری من نییە، لەگەڵ تەوتین هەمان ناوەڕۆکیان هەیە و تەنیا لە ڕووی ناوەوە جیاوازن. 

 

لێدوانی فەرمی: بیلال حەمدانی، بەڕێوەبەری گشتیی بانکی بازرگانی عێراق (TBI) ڕایگەیاند:  شاندی ئێمە سەردانی هەرێمی کوردستانیان کرد و لەگەڵ شاندی حکومەتی هەرێمی کوردستان کۆبوونەوە، لێکتێگەیشتن و هەماهەنگیی باشمان لەبارەی تەوتینەوە هەیە، بەو مانایەی کە تۆ هەژمارێکی بانکیت هەبێت پەیوەست بێت بە توانای بانکییەوە. 

بابەتی ستراتیژی: تیمی هەژماری من بە ئاڤا نیوزی ڕاگەیاند: هەر فەرمانبەرێک بیەوێت هەژمار لە TBI بکاتەوە لەڕێگەی فۆرمی هەژماری منەوە دەتوانێت ئەو بانکە هەڵبژێرێت. 

 

ئەوەی چاوەڕوان دەکرێت: بانکی (TBI) چاوەڕوانی هەرێمی کوردستان دەکات بۆ ئەوەی لیستی ناوی فەرمانبەرانی بۆ بنێرێت، ئەوکات هەژماری منیان بۆ دەکرێتەوە. 

 

ئەو مانایەی دەیگەیێنێت: هەرێمی کوردستان و بانکی (TBI) لەسەر ڕێکارێک ڕێککەوتوون کە سیستمی ڕاکێشانی پارە لە تەوتین و هەژماری من جیاوازی نابێت، تەوتین و هەژماری من تەنیا بەناو جیاوازن، هەمان پرۆسە و ڕێکارن. 

 

زانیاریی زیاتر: بەڕێوەبەری بانکی بازرگانیی عێراق جەختی کردەوە کە لەسەر هەموو بابەتە تەکنیکییەکان لەگەڵ حکومەتی هەرێمی کوردستان ڕێککەوتوون و دەڵێت: " ڕێککەوتنێکی باشـمان هەیە".

 

لەلایەکی دیکەوە: کازم نامیق، بەڕێوەبەری بانکی ناوەندیی عێراقی لقی هەرێمی کوردستان ڕایگەیاند: ئێمە ڕەزامەندیمان لەسەر 43 بانک بۆ بەشداریکردن لە پرۆژەی هەژماری من داوە، بانکەکانیش لە چۆنییەتی مامەڵەکردن لەگەڵ پرۆژەکە سەرپشک کراون. 

 

شێوازی جێبەجێکردنی: مامەڵەکردنی پرۆسەی تەوتین و هەژماری من لەسەر کارەکانی وەزارەتی دارایی هەرێمی کوردستان و بانکەکان دەمێنێتەوە.