سەرۆکوەزیران بارزانی لیژنەیەک بۆ بەهەمیشەییکردنی مامۆستا و فەرمانبەرانی گرێبەست دادەمەزرێنێت

ئاڤا نیوز 

 

سەرۆکوەزیران بارزانی لە کۆبوونەوەی ئەنجوومەنی وەزیران لیژنەیەکی بۆ بەهەمیشەییکردنی 30 هەزار مامۆستا و فەرمانبەرانی گرێبەست ڕاسپارد.

 

وێنە گەورەکە: ڕۆژی چوارشەممە 08-05-2024 بە ئامادەبوونی سەرۆکوەزیران مەسرور بارزانی، کۆبوونەوەی ئەنجوومەنی وەزیران بەڕێوەچوو، گفتوگۆ لەبارەی چەند پرسێک کرا. 

 

لێدوانی فەرمی: بە هەمیشەییكردنی 30 هەزار مامۆستا و فەرمانبەری گرێبەستە لە هەرێمی کوردستان تەوەرێکی کۆبوونەوەکە بوو، پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی ڕاگەیاند، "سەرۆکوەزیران بارزانی لیژنەیەکی ڕاسپارد بۆ بەدواداچوونی ورد لەسەر ناو و ساڵی گرێبەستی ئەو مامۆستا و فەرمانبەرانەی گرێبەستن، هەروەها لیژنەکەی ڕاسپارد بۆ گفتوگۆ لەگەڵ بەغدا بەمەبەستی دۆزینەوەی میکانیزمیک لە چۆنیەتی مامەڵەکردن لەسەر ئەم پرسە."

 

بۆچی گرنگە: لە هەرێمی کوردستاندا نزیکەی 30 هەزار مامۆستا و فەرمانبەر هەن کە حکومەتی هەرێمی کوردستان وەک گرێبەست لە قوتابخانە و فەرمانگەکان دایمەزراندوون و چاوەڕێی بە هەمەیشەییکردنیان دەکەن؛ ئێستا کەیسەکانیان لە ئەنجوومەنی وەزیرانە بە مەبەستی بڕیاردان لە بەهەمیشەییکردنیان.