ڕاوێژکارێکی خامنەیی: ئێران توانای بەرهەمهێنانی چەكی ئەتۆمی هەیە

ئاڤا نیوز

 

ڕاوێژكارێكی خامنەیی ڕایدەگەیێنێت، ئێران توانای بەرهەمهێنانی چەكی ئەتۆمی هەیە و ئەگەر ئیسرائیل هێرش بكاتە سەر دامەزراوە ئەتۆمییەكانیان، ستراتیژیی ئەتۆمییان دەگۆڕن.

 

وێنە گەورەكە: گەورە بەرپرسانی ئەمنیی ئێران ئەوەیان ئاشکرا کردووە، زانیاریی وردییان لایە کە ئیسرائیل پلانی هەیە هێرش بكاتە سەر ناوەندە ئەتۆمییەكانی ئێران.

 

لێدوانی فەرمی: كەمال خەڕازی، ڕاوێژكاری ڕێبەری كۆماری ئیسلامیی بۆ كاروباری نێودەوڵەتی گوتی: "زانیارییمان لەسەر هێرشی ئیسرائیل بۆ سەر ناوەندە ئەتۆمییەكانی ئێران هەیە، ئەگەر ئەمە ڕووبدات، ئێران ستراتیژیی ئەتۆمی خۆی دەگۆڕێت و  پلانی تۆكمەشمان هەیە".

 

زانیاریی زیاتر: خەڕازی ئەمەی بە کەناڵی قەتەریی جەزیرە گوتووە و پێداگری لەسەر ئەوە کردووەتەوە کۆماری ئیسلامی "خاوەن توانای بەرهەمهێنانی بۆمبی ئەتۆم"ـە. خەڕازی کە لە سەردەمی سەرۆککۆماریی محەمەد خاتەمی، وەزیری دەرەوەی ئێران بوو، دوو ساڵ بەر لە ئێستا هەر لەگەڵ جەزیرە باسی توانا تەکنیکییەکانی ئێرانی لە دروستکردنی بۆمبی ئەتۆم کردبوو بەڵام نەیوتبوو دەیانهەوێت دروستی بکەن.