گرووپە چەکدارەکانی عێراق دوو پێگەی ئیسرائیل دەکەنە ئامانج

ئاڤا نیوز  

گرووپی "مقاوەمەی ئیسلامی لە عێراق" ڕایدەگەیێنێت، لە ڕێگەی درۆن و هێرشی مووشەکی، دوو شوێنیان لە ئیسرائیل کردووەتە ئامانج، دەشڵێن "بەردەوام دەبن لە بە ئامانجگرتنی پێگەکانی دوژمن".

ڕاگەیێنراوی فەرمی: گرووپی مقاوەمەی ئیسلامی لە عێراق ڕایگەیاند: "ئەمڕۆ پێنجشەممە 9-5-2024  موجاهیدییەکانی مقاوەمەی ئیسلامی لە عێراق، بنکەی نەڤاتیمی زایۆنیستیان لە ناوچەی بئر سەبع و لە ڕێگەی فڕۆکەیەکی بێ فڕۆکەوانەوە کردووەتە ئامانج".

لە لایەکی دیکەوە: هەر ئەمڕۆ گرووپی مقاوەمەی ئیسلامی لە عێراق ڕایگەیاند "لە ڕێگەی مووشەکێکی کرووزەوە، بۆردوومانی بەندەری نەوتی ئەسقەلانیان لە خاکی فەڵەستینی داگیرکراو" کردووە.

زانیاریی زیاتر: گرووپە چەکدارەکەی عێراق ئاماژە بەوە دەدات "ئەو هێرشانەیان بۆ سەر بنکەکانی ئیسرائیل لە بەرامبەر بەرەنگاربوونەوەی داگیرکاری و پشتیوانییە لە گەلەکەمان لە غەززە".

وێنە گەورەکە: لە حەوتی ئۆکتۆبەری ساڵی ڕابردووەوە کە شەڕ لە نێوان ئیسرائیل و حەماس دەستیپێکردووە، چەندین گرووپی نزیک لە ئێران دەستیان بە هێرشکردنە سەر ئیسرائیل و بەرژەوەندییەکانی ئیسرائلیل و ئەمریکا و وڵاتانی ڕۆژئاوا لە کەنداوی عەرەب و دەریای سوور کردووە.