دەوڵەمەندەكانی جیهان چۆن سەرمایەكانیان زیاتر دەكەن؟

ئاڤا نيوز

دەوڵەمەندەکانی جیهان پارەکانیان بەشێوەیەکی کارا بەکاردەهێنن و لەڕووی بیرکردنەوەوە جیاوازن لەگەڵ خەڵکی ئاسایی.

ژمارەکان وا دەڵێن: بە پێی داتاکانی کۆمپانیای Wrise Wealth Management 28 هەزار و 420 ملیۆنیر لە جیهاندا هەن.

لێدوانی فەرمی: جۆ یاراک، سەرۆکی بەشی بازاڕە جیهانییەکان لە کۆمپانیای "سیدرا مارکێتس بە " سکای نیوزی عەرەبی"ی گوتووە: ملیۆنێرەکان هەمیشە پێیان باشە پارەکانیان ئاراستەی وەبەرهێنانی تاڕادەیەک کلاسیکی بکەن، بۆیە ئەوان سەروەت و سامانی خانووبەرە و پشک و قەرزی تایبەت تێکەڵ دەکەن، جگە لەوەی ڕەنگە هەندێک وەبەرهێنانی سەیر بکەن.

زانیاریی زیاتر: بە گوتەی جۆ یاراک ملیۆنیرەکان لەم بوارانەی خوارەوە وەبەرهێنان دەکەن: 

کەرتی نیشتەجێبوون
ملیۆنێرەکانی جیهان بەشێکی بەرچاوی پارەکانیان لە کڕینی یەکەی نیشتەجێبوون وەکو؛ ڤێلا،خانووبەرە و هۆتێلە گرانبەهاکان تەرخان دەکەن، هەروەها گرنگی بە کڕینی کۆشکە مێژووییەکان دەدەن.

نووسینگەکانی خێزان وەک ئامرازی وەبەرهێنان
 ئەو کەسانەی کە سامانێکی زۆریان هەیە، بە گشتی پارەکانیان لە ڕێگەی فەرمانگە خێزانییەکانەوە بەڕێوەدەبەن، کە مامەڵە لەگەڵ هەموو شتێکدا دەکەن، لەوانەش بەڕێوەبردنی خەرجییەکانی خێزان، تەنانەت دابەشکردنی میراتیش، ژمارەی فەرمانگە خێزانییەکان لە جیهاندا لە ساڵی 2019ەوە سێ هێندە زیادی کردووە، لە ساڵی 2023دا چوار هەزار و  500 ئۆفیسی تێپەڕاندووە.

وەبەرهێنانی جێگرەوە
بەشێکی زۆر لە ملیۆنێرەکان پارەکانیان لە ڕێی کڕینی هەندێک تابلۆی گرانبەها دەخەنە وەبەرهێنانەوە، چونکە بەهاکانیان بەرزە، جگە لەوەی لە پێناو بەرزکردنەوەی پێگەی تایبەتی خۆیان کاری خێرخوازی ئەنجامدەدەن و ڕێکخراوی خێرخوازیی درووست دەکەن کە  یارمەتییان دەدات لە لێخۆشبوونی باج.

وەبەرهێنان لە یانە وەرزشییەکان
لە چەند ساڵی ڕابردوودا سەرمایەدارانی جیهان بەلای وەبەرهێنان لە یانە وەرزشییەکان چوون، پارەکانی خۆیان لە کڕینی یانە وەرزشییەکان خەرجدەکەن. لەڕووی ماددییەوە قازانجێکی زۆری هەیە.

لە ڕابردوودا یانەی وەرزشی بەهاکەی 200-300 ملیۆن دۆلاری ئەمریکی  بووە، ئێستا بەهاکەی چوار ملیار دۆلاری ئەمریکیی تێپەڕاندووە.  

کەسایەتییە هەرە دەوڵەمەندەکانی جیهان:
برنارد ئاڕنۆڵد: 233 ملیار دۆلار
ئیلۆن مەسک: 195 ملیار دۆلار
جێف بیزۆس: 194 ملیار دۆلار
مارک زوکەربێگ: 177 ملیار دۆلار
لاری ئیلیسۆن: 141 ملیار دۆلار 
واڕن بافێت: 133 ملیار دۆلار